Yobu 9 - Mawu a Mulluku

Yobu

¹ Vano Yobu ahaakhulla wi,

² “Ddawoona, ddenndda kinnadduwella. Koma muthu ttuulungama mwawiidde vamiitthoni va Mulluku?

³ Khaavo anaawore ovaanyihana ni Mulluku, mwa makohwaaye manchichi khaavo anaakhullevo ello.

⁴ Mulluku tti eezeru ni amasiva, khaavo anaallipanena ni opambana.

⁵ Moorurumusa, olliye annasusa miyaango, mu owallaaye annaddiphikirisa.

⁶ Annayitikha ellapo yavatthi, apotwiiwa ennatthukumella.

⁷ Olliye ttuulamula nndduwa wi nihikhume, ttuuhiiha etheneeri wi ddihiwale mahiiyu.

⁸ Mulluku yeekha ahaanddellella ddooddullu, olliye sika aneeta va mafunde a va enyanja.

⁹ Olliye sika aphatusalle etheneeri Thanda, Muhomekiwiiphe, Ompotokhamuyaawo ni etheneeri ddittheddene dda omwera.

¹⁰ Olliye sika aneera dduullupalli ddoohiiweseseya, oyo aneera ddoottikhiniha ddooheerengeya.

¹¹ Ddawoona, Mulluku eeta vakhuviru, miyaano nginamoona, aakiviraka vakhuviru, nginamuhella miittho.

¹² Ngoonani, annaakha. Ethiyo ttaani anaamuhiihe? Ethiyo ttaani anaamukohe wi, ‘Ethiyo oneera tini?’

¹³ Mulluku khanahokollosa owallaaye, annawoononga ayo enamukavihera Rahabu.

¹⁴ Vano miyaano ttuumwaakhulla mwawiidde? Nave maweene kinaakuse wuuwi?

¹⁵ Naari kiri oohichimwa, ngiwora wiiteteza, ookiipa mullatu akeerelle echifundo.

¹⁶ Naari kamwiithanilleke, olliye aakhulla, nginakhulupilila wi eerewiiwa mawaaka.

¹⁷ Vawi annakuukutha ni ephevo yawoopiha, annakoonjerera makhwata vihiri ekaamba.

¹⁸ Khanakihiya wi kiithuuwe, annakoonjerera ddoowaawa.

¹⁹ Ollota dda masiva, ethiyo ttuullipanana? Ollota dda echilungamo, aneerollota wi, Ttaani anaakikuselle o nthato namillatu?

²⁰ Naari kiri oohilakwa, eyanwaaka eneerokivaanyiha, eneerokiphwanya ni yoolakwa naari kihipahunlle ello.

²¹ Naari kihinna mullatu, kinniinyaambusa meekha, kinnawuvevulla okumaaka.

²² Tti emoddamoddave, sika kinallota wi, Mulluku annawoononga nimodda oochimwa ni oohichimwa.

²³ Mullilli wamwiipha muthu moorurumusa, Mulluku annattheya otulli wa oohichimwa.

²⁴ Ellapo yavatthi yoovelleelliwa wa oonanara, miittho a oweeruza aakhuneelliwa. Aahikhalla olliye eerille ddenndda, ethiyo ttuukhallattho aani?

²⁵ Mallapwaaka ennathamaka, ennathawa, khenoona erive yaphaama.

²⁶ Ennaakuva wonanko ekallawa yoothamaka, wonanko neekhwaambe anaphara enama.

²⁷ Apaalle ttuullota wi kineerotiwalla okhupanya waka, ekhovaaka khemora nave kineerohakallalla.

²⁸ Koma kinoova ddoohoosa ddaka ddittheddene, kinnadduwella wi Mulluku khakeesa oohichimwa.

²⁹ Mullatu wakiipha, vano yawiihoosella tti tini?

³⁰ Kihapeve mwawiidde maaddi aweellesesa apaalle kihuwe mattaaka ni sopo,

³¹ Mulluku aneerokivokhellave oddallani, naari ddoowara ddaka ddineerokinanara.

³² Vawi Mulluku khe muthu wonanko mi, nginaphwanella waakhullanana, ngiwora wipanana mullatu.

³³ Khaavo ooneeruza, oopopheya matta va eellihi.

³⁴ Apwiya ehikillake ni ekopwiiwa, kihitathille murima ni owoova.

³⁵ Vano kineerollota moohoova, koma ddikhallelliiwammu, ngaaheya.”