Yobu 8 - Mawu a Mulluku

Bilidadi

¹ Vano Bilidadi a o Shuhi aallota wi,

² “Ethiyo onaallotekeve ophiyera niini? Mawaawo tti ephevove!

³ Ethiyo Mulluku annahollosa echiweruzo? Ethiyo Amasiva Mattheene annarukunusa echilungamo?

⁴ Apaalle anaawo yaamuchimwella Mulluku sika ahaallaka ekaamba ya machimwiiwaayo.

⁵ Weyaano warukunuwella wa Mulluku, wavekella wa Amasiva Mattheene,

⁶ wakhalla aphaama ni oolungama, ddawoona, Mulluku aneerovenya ni wuukavihera aneerewuuhokollosella ddaphaama ddawuuphwanella.

⁷ Naari maambellwaawo yaari mang'onong'ono, mamallihellwaawo enaakhalle muullupalli.

⁸ Vano mwawuuveka koha wa athu akhalle, ganizesesa nnddo makhollwaahu yakumanniiwana.

⁹ Hiyaano tti anamwani ooddillo, khaninadduwella ello, Mallapwaahu a va ellapo yavatthi tti wonanko muuthuuchi.

¹⁰ Ethiyo athu akhalle kheyuuhuddiha ni wuulleella, khellota ddavatthi va murimiiwa?

¹¹ Ethiyo nibungwa ttuuphuwa vihiri munyezi? Ethiyo mululu ttuumella vihiri maaddi?

¹² Vaahikhalla maaddi piillinndda ddinnanyaalla, ddiri ddikitthi nave ddihinaphaddiwe, kheddinallekella wumma okhwaranya erive ello.

¹³ Emoddamoddave yeeyo ni oomutiwalla Mulluku, etiyerello ya oohimullapella Mulluku ennamalla.

¹⁴ Ollipa murima wiwa onnapallalleya, ennaphaddeya wonanko randasi.

¹⁵ Aneerohameella enyumbaaye koma khellipa, aneeroyipharesesa koma khevillella.

¹⁶ Annunnuwa phaama vanndduwani, enthambi ddaye ddinnarapa m'matani mwaye.

¹⁷ Misisi ddaye ddinnarapa mookorowanjellana, ddinummellella vamallukuni.

¹⁸ Koma mwamutulla va nipuro vayemvo, khaavo naari anaadduwelle wi olliye aari vaavo.

¹⁹ Ddawoona, ella sika ehakallallo ya okumaaye, vatulli viwa amodda eneerotthupulluwella va nipuro naye.

²⁰ Ddawoona, Mulluku khanamukhoota oohilakwa, navettho khanamukavihera oochimwa.

²¹ Vawi olliye aneerewuuttheyihattho nave aneerewuukhuwiha moohakallalla.

²² Awiitana ni weyaano aneerowulliwa muru nave musasa wa oonanara khowa wooneyattho.”