Yobu 7 - Mawu a Mulluku

¹ “Ethiyo muthu khanakhallella osenda miino veellaponimva, mallapwaaye kheri wonanko a aganyu?

² Wonanko kaporo ooseremella muuthuuchi, wonanko aganyu ootiyerella mallivellwaaye,

³ kinnahoowa enthawi ddittheddene, naari mahiiyu kinnoona ovoreya.

⁴ Kaakonaka kinniikoha wi, ‘Ethiyo onaase enthawi tini?’ Koma mahiiyu onnarekama, kinniirukunusarukunusa ophiyera ohinase.

⁵ Mwiillaaka ori miinguve ni nihiryove, nttapara naka nohaahuwa nave niri marohive.

⁶ Mallapwaaka enathamaka okhwaranya matchini a ddoowara, voohikhalla etiyerello, ennamalla.

⁷ Mulluku upuwellani, okumaaka tti wonanko mpweya, ngiwa koona erive ello yaphaama.

⁸ Niittho nno nikoonille khaniwa nikiwehattho, vawi vookaashaashani kinaakhalle kiviralle.

⁹ Wonanko othiima ni omwareya wa murapo, ookitthella o mahame khanahokollowawo.

¹⁰ Khanahokollweellattho owaniwa, ayo akhalleeyena ennamutiwalla.

¹¹ Ngini keere ellapo tuu! Kineerollota ekaamba yoovoreyiwa murima, kineerokhupanya ekaamba yoovoreyiwa murima.

¹² Ethiyo mi kiri enyanja, apaalle enama yawoopiha yamunyanja, wi mukilembelle alonda?

¹³ Kakonaatthi wi murima wiithuuwe, wi kivume vabedini vaka,

¹⁴ nyu munnakoopopiha ni olloha, munnakitthukumelliha ni masomphenya.

¹⁵ Sika tti waphaama wiimakellella ni okhwa, okhwaranya okhallella ovoriiwa ddiidda.

¹⁶ Okumaaka wookitopiha, ngikhalla wa enthawi yoohimalla, kihiyeni meekha, okumaaka tti mpweyave.

¹⁷ Ethiyo muthu tti oopaalleya mwawiidde wa nyuwaano, kaambiiwa tini munamuhiyeenyu vamurimani?

¹⁸ Munnamuwehesesa orive ohinase, munnamweesa enthawi ddittheddene.

¹⁹ Ethiyo munaahiye niini okiweha wi apaalle ttuumirya mare?

²⁰ Ethiyo kachimwa kinnuukatamihani nyu mulonda a athu? Kaambiiwa tini mukitthattusalleenyu yaweerellavo echaandamale? Kaambiiwa tini kiriimi wonanko katundu oollemella wa nyuwaano?

²¹ Kaambiiwa tini muhinakikhululukelleenyu machimwaaka ni okivenyihella ddoolakwa ddaka ddittheddene? Vawi enthawi yoovollowa mu mahame ehanlle vang'ono, muneerokaasha koma khamuwa mukoonattho.”