Yobu 6 - Mawu a Mulluku

Yobu

¹ Vano Yobu ahaakhulla wi,

² “Waphaama ohoosiwa waka weesiweke, otullaaka ottheene walingiweke vamodda vasikeloni.

³ Vawi ddaaweerollemella okhwaranya mihava wamunyanja, sika ekaambiiwa kinalloteemi mookhaddulla.

⁴ Vawi mipaamba dda Mulluku Amasiva Mattheene ddookihoma, okumaaka wooddalla ni nttipwi niwa. Ddawoopiha dda Mulluku ddookuupa.

⁵ Ethiyo bulu ttuuwinlla ari ni munyepu? Ethiyo eng'ombe ttuuwinlla eri ni yoocha?

⁶ Ethiyo yoocha yoohiddiva ttuuchiwa ehinna mwiinyu? Ethiyo yaweella ya nooche ennaddiva?

⁷ Nginnana munkhella naari vang'ono ddoocha ddenndda, ddiri wonanko yoocha yookeetiha murima.

⁸ Waphaama kaakhenlleke yoovekaaka, waphaama Mulluku akivahilleke etiyerellwaaka.

⁹ Waphaama Mulluku akinyennyeke, akoonongilleke ni nnatta naye.

¹⁰ Nndda ddeerokikhurumusa murima, keerohakallallana naari ddivoreye mwawiidde vawi ngaakhootille mawu a Aweella.

¹¹ Ethiyo kookhallave ni masiva wi ttuutiyerella okumi? Ethiyo okumaaka onarekamella tini yaarimi etiyerello ehiivo?

¹² Ethiyo masivaaka tti wonanko a nlluku, apaalle mwiillaaka tti wonanko mukoko?

¹³ Ddawoona, nginnattho masiva awiivullusella, nginna virive veko voohameella.

¹⁴ Va ddoohoosa wonanko nndda kinnaapaallesesa akhwaaka oororomelleya, khaya kinnamoova Mulluku apaalle iyaayi.

¹⁵ Koma akhwaaka tti awoottha, tti wonanko maaddi am'mitthipiddani, wonanko asimihinje oohillekella wumma.

¹⁶ Maaddiiwa ennaripa ekaamba ya maaddi oomakana, wonanko nakhuttu oottotthowa.

¹⁷ Enthawi yeellimwe khenooneya, otte waviha ennawelleella.

¹⁸ Avoolendoni ennahollowa vawaashaashani maaddi, enneeteeta ni omallella muhakani.

¹⁹ Avoolendoni a o Tema ennawaashaasha, avoolendoni a o Sheba ennaatiyerella.

²⁰ Ennatathilla murima vawi yatiyerella ophwanya maaddi, koma voophiyani wenko ennakhumuwa kaambiiwa yahumma.

²¹ Mmu sika mukhallelle nyuwaano wa miyaano, mohoona otullaaka nave munimoova.

²² Ethiyo mi kohuuvekani emphaso apaalle wi mukivelleellelle yamukaphwani?

²³ Ethiyo koollota wi mukivulluse wa mudani apaalle wi mukoopolle wa ookihoosa?

²⁴ Kilangizeni nave kineerewaapella maaru. Killeelleni eyo kichimwalleemi.

²⁵ Mawu awoona ennahoma murima koma nyuwaano munahumullulla shisha.

²⁶ Ethiyo kaambiiwa tini munahumullulleenyu mawaaka? Ethiyo munaganiza wi mawu a ootathilla murima tti ephevo?

²⁷ Ddawoona, ttuumukulliha naari mukhwaadduni, ttuwaakhella makobiri va okumi wa mukhwiinyu.

²⁸ Ngakiweheseseni phaama ekhove. Ngillota ddawoottha vamiitthoni vanyu.

²⁹ Mukeerelle echifundo, hiyani ddoohilungama, muhikiipe mullatu vawi kiri oolungama.

³⁰ Ethiyo muneesa wi kinallota ddawoottha apaalle wi nginahiyaniha yaphaama ni yoonanara?”