Yobu 42 - Mawu a Mulluku

¹ Vano Yobu aawaakhulla Apwiya wi,

Yobu

² “Kinnadduwella wi munnawora weera erive ello, kheyiivo yookukureyiha yoopaallaanyu.

³ Mwaakikoha wi. ‘Ethiyo ttaani ananariha malangizo ahidduwellaka erive ello?’ Ddawoona, kaallota nnddo kahidduwelleemi ddoottikhiniha nnddo kahiddiweseselliime phaama

⁴ Mwaakilleella wi, ‘Apellaka maaru kaallotaka. Akhullaka kaakohaka.

⁵ Kaaniiwa dda nyuwaano ni maarwaaka koma vano koowoonani ni miitthwaaka.

⁶ Sika kohiinyaambusa meekha, kinalapa vawiihellani nthupi ni ntuura.’ ”

Omalliha

⁷ Apwiya emallihalle ollota mawu yaalla ni Yobu, yaamulleella Elifazi Mutemani wi, “Mi kohuushella murima wunchichi weyaano vamodda ni akhwaawo eellaayo vawi khemwaallonte ddaphaama dda miyaano wonanko eerelle oorumeyellaaka Yobu.

⁸ Sika vano kusani anankhoro a eng'ombe atthanu ni eelli ni anankhoro a enkhosa atthanu ni eelli nave muyeena wa oorumeyellaaka Yobu wi mwiivelleellelle mukutho. Nave oorumeyellaaka Yobu aneerewuuvekellani vawi kineerewaakhullella ovekella waye wi kihiweerelleni ello moollikana ni okarangeya wanyu. Vawi nyuwaano khemwaallonte ddaphaama dda miyaano wonanko eerelle oorumeyellaaka Yobu.”

⁹ Sika Elifazi Mutemani, Bilidadi Mushuki ni Zofari Munaama yaheera nnddo Apwiya yaalleellilliiwa. Nave Apwiya yahiiwellella ovekella wa Yobu.

¹⁰ Sika Yobu aavekellelle akhwaayaalle, Apwiya yaamuhokollosella eyuumaaye. Yahaatiha opiilli nnddo aariiyena khalle.

¹¹ Vano asinne attheene ni arokoriye attheene vamodda ni attheene oomudduwella yaawa echana nimodda mpa mwaye. Nave yaamupepesa, emukhurumusa murima ekaamba ya ddoohoosa ddittheddene nnddo Apwiya yamorihelliiwa va olliye. Sika arive muthu mwa alliwaayo aamuvaha makobiri ni emphete yagolide.

¹² Apwiya yaamudalisa Yobu va mamallapwaaye oomallihella okhwaranya awaamba vawi aakhalla ni enkhosa 14,000, ekamira* 6,000, eng'ombe ddamutteko 2,000 ni abulu aatthiyana 1,000.

¹³ Ahaayarattho anamwani aallopwana atthanu ni eelli ni anamwani aatthiyana araru.

¹⁴ Mwaana aamutthiyana awaamba aamwinnya nnddina nawi Yemima, aneepiilli aari Keziya nave aneeraru aari Kerehapuki.

¹⁵ Mu ellapo ettheeneeyo khemwaari atthiyana ooreera wonanko anamwani a Yobu nave ttiitthiiwa ahaavaha yoohallana wonanko arokoriwa.

¹⁶ Vatulli viwa Yobu aakhalla ni okumi miyakha 140. Sika aawoona anaaye ni edduullu ddaye ophiyera mbado waneesese.

¹⁷ Nave Yobu akhwille mwamurendelle navettho uulluvallille wunchichi.