Yobu 41 - Mawu a Mulluku

¹ Ethiyo ttuukoka Leviyatani* ni embeza apaalle omaka nllumi niwa ni mukwe?

² Ethiyo ttuuyimaka ni mukwe mphunani mwiwa, apaalle oyiphovolla etwaatwara ni embeza?

³ Ethiyo ttuullota ni weyaano mawu awiithaalla? Ethiyo ttuuwuuveka wi oyeerelle echifundo?

⁴ Ethiyo ttuukeraatthiha echipangano ni weyaano wi ekhalle oorumeyellaawo wa enthawi yoohimalla?

⁵ Ethiyo ttuuttheellana wonanko epallame apaalle oyimakellella wi anamwallaawo yaahakallalliheke.

⁶ Ethiyo amalonda ttuukambirana ddooyikulliha, apaalle oyikawana enameeyo wi yayikullihe?

⁷ Ethiyo nttapara nene ttuunihoma ni nivaka apaalle murwiiwa ni momba

⁸ Wayiphara ni nnatta nawo, khowa otiwalla ekhotweene.

⁹ Ddawoona, arive muthu annatathilla murima, aniikuhavo yeekha ni woova oona Leviyatani.

¹⁰ Khaavo oollipa murima anaaheye oyittatthamulla. Vano ttaani oyo aniimelle vamiitthoni vaye?

¹¹ Ethiyo ttaani anaamullike ahimuhokollosella? Erive ello eri ellapo yavatthi tti yaaye.

¹² Ngikhurumuwa kihinallote dda eziwalo ddaye, dda masiviiwa ni dda mooneyellwiiwa aphaama.

¹³ Ttaani anaayaatte nttapara niwa? Ttaani anaaphovolle echida yakhoto enawariiwa?

¹⁴ Ttaani anaahulle owanoni wiwa wowaapheelliwa ni miino awoopiha?

¹⁵ Etullaaye yookhalla ni makakharunya, oollutellellana nave oollipa wonanko nlluku.

¹⁶ Makakharunyaayo tti oollutellellana vawi naari ephevo khenavira variyari viwa.

¹⁷ Tti oollutellellanallutellellana, tti oomarellana nave khenathawana.

¹⁸ Yaawethyemuraka ennasherima, miitthwiiwa tti wonanko owala wa ohinase.

¹⁹ Muwano mwaye munnakhuma mitthiko ddamunllo, Muwano mwaye munnanthamuwa munllo.

²⁰ Mphunani mwaye munnakhuma mwiisi, wonanko mwiisi wa va epalli yeeyiwe va munllo wa manasi.

²¹ Mpweyaaye onnakhariha mankhalla, mallumi amunllo ennakhuma muwano mwaye.

²² Nikohi naye tti namasiva manchichi, arive muthu ookumanana annatthukumella ni woova.

²³ Mihehe dda mwiillaaye tti ddooshashaalla, ddoopharaana nave ddoohitikheya.

²⁴ Murimaaye tti woollipa wonanko nlluku, wawumma wonanko nlluku na nsillo.

²⁵ Anyaruwa naari amasiva ennoopopiheya. Yiiwa mukhitwaaye, ennatthukumella.

²⁶ Naari mumukakathe ni nsupada, kheyiivo eneereya, naarittho ni nivaka, mpaamba apaalle momba.

²⁷ Mukoko anneesa muttatthi, mukuwa onakhalla wonanko muteekho wawunta.

²⁸ Khawiivo mpaamba onaawore omuthawiha, malluku a mulegeni annaatthattusa makattha.

²⁹ Ekoonda anneesa makattha, annattheya aavokhelliwaka nivaka.

³⁰ Omirimani waye tti wonanko mavalli awiisha, annaddaanddellella m'matokwini wonanko nigareta noomuuputhella tirigu.

³¹ Ennaavihiha maaddi oowallamella wonanko a mwiipallini, ennavidduwiha enyanja wonanko epalli yaweekellamo makhura.

³² Ennahiya mutulli mwiwa niphoru, mwawi mmodda ttuuganiza wi enyanja yoomella embwi.

³³ Va ellapo yavatthi kheyiivo yoophwanaphwanana, tti yoophatusiwa yoohoova.

³⁴ Annavevulla enama ddittheddene, tti mwene a ddawiitukhulla ddittheddene.