Yobu 40 - Mawu a Mulluku

¹ Vano Apwiya yaallota ni Yobu wi,

² “Ethiyo muthu oohumullulla ttuullipana ni Amasiva Mattheene? Vano oyo anapikisana ni Mulluku aakhulle.”

Yobu

³ Vano Yobu aawaakhulla Apwiya wi,

⁴ “Ddawoona, miyaano kheello! Ethiyo ttuuwaakhullani tini? Khayiivo, muwano mookumma.

⁵ Koollota omodda, ngaakhullattho. Koollota opiilli, ngoonjererattho.”

⁶ Vano Apwiya yaamwaakullattho waneepiilli Yobu oweella mu namangalle wi,

⁷ “Khozeka moollipa wonanko mullopwana, kineerewuukoha nave okaakhulle.

⁸ Ethiyo ttuukeesa miyaano oolakwa? Ethiyo ttuukihumullulla wi we okhalle oolungama?

⁹ Ethiyo wookhalla ni muwono wamasiva wonanko Mulluku? Ethiyo mawaawo ttuugugudeya monga eneerella aaka?

¹⁰ Ddaarimi ddiri ddiiddo ireerihe ni omwene ni oriiheya, iwarihe weekha olemu wunchichi.

¹¹ Mwara owallaawo woosefukella, Wamoona muthu awiitukhulla omuyevihe.

¹² Omuwehe arive muthu awiinyarulla nave omuyevihe, waanyingallelle oonanara mvo yiimenlliiwa.

¹³ Attheenaayo waavuhellelle munthupini, waamake mu ellapo ya ookhwa.

¹⁴ Vatulli viwa, kineerewuutthamalla wi masivaawo ahuupambaniha.

¹⁵ Ngoona, dda Behemoti, kaawuphatusa monga kuuphatuselleemi weyaano. Olliwa onacha munyepu wonanko eng'ombe.

¹⁶ Ngoona, masiviiwa eri muyuununi mwiwa, koma ekophollo ddiwa ddiri m'muheheni dda erukullwiiwa.

¹⁷ Onniimesa mwiilliiwa moollipa wonanko mukunguza, m'miheheni dda akasambariiwa tti ddoolluwana vamodda.

¹⁸ Makhuviiwa tti oovallalla wonanko mukuwa, epararu ddiwa ddiri wonanko mikoko ddoollipa.

¹⁹ Mvuwu tti woottikhiniha mwa mitteko dda Mulluku! Oyo awuphatusalle sika anawugonjiha ni nsupada naye.

²⁰ Onaphwanya yoocha omutundani nko onattheella enama ddittheddene ddamuhakani.

²¹ Onakona vatthi va miteekho ddamiiwa, onniipittha mpangoni dda m'munyezini.

²² Miteekho ddamiiwa ddinnawukhuneella, nnjalle nam'maaddini ninnawutiitha.

²³ Naari maaddi a m'muhinjeni enyaruweve, olliwa khonoova. Naari Yordani asefukellaka onnallipa murima.

²⁴ Ethiyo ttaani anaawore owukoka ni embeza apaalle omaka ephuniiwa ni musampha.”