Yobu 4 - Mawu a Mulluku

Okambirana wawaamba Elifazi

¹ Vano Elifazi Mutemani aallota wi,

² “Yobu, ethiyo mmodda awaakhulla ttuunanariwa? Ethiyo ttaani anaawore ohillota?

³ Ngoona, wohaalangiza anchichi, wohaallipiha murima oofooka.

⁴ Mawaawo yaamullipiha ookwakwatuwa, yaamukavihera oovelleveddeya makuttha.

⁵ Koma vawi ddohuukatamiha wootathilla murima, dduumorelleewe, woova wohuuphara.

⁶ Ethiyo eroromellwaawo kheri mu omoova wawo Mulluku? Etiyerellwaayo kheri mu ohichimwa wawo?

⁷ Upuwella phaama, ethiyo oohilakwa annoonongiwa? Apaalle tti wuuwi oolungama yatthollosiwiiwa?

⁸ Kohoona wi enaalla machimo ni omidda ddoonanara, enahata emoddamoddave.

⁹ Ni ovuma wa Mulluku, ennoonongeya, ni owallaaye annaashellelliha.

¹⁰ Ennathuruma wonanko mukango, koma miinwiiwa aakhulliwa.

¹¹ Mukango wamasiva onnakhwa vooramani enama, anamwani a mukango waamutthiyana ennamwareya.

¹² Vano mawu awiipittheya yaakiphwanya, naaru naka nahiiwa onong'onanko.

¹³ Nndda ddaakihoosa mahiiyu moolloha mvo athu enakhwiiwa ni ekhove.

¹⁴ Kahoova nave kahaamba otthukumella, mwiilli muttheene waakophowa.

¹⁵ Ekhovaaka yahoopiwa ephevo yooriiryella, mapururu a vamwiillini vaka yaanyaruwa.

¹⁶ Ello yahiimella ddollollo, ngaayoonesesa makhallellwiiwa. Ddawoona Ello yahiimella vahoollo vaka, ellapo eri tuu, kahiiwa mawu wi,

¹⁷ Ethiyo muthu ttuulungama vamiitthoni va Mulluku? Ethiyo muthu ttuukhalla oohichimwa vamiitthoni va oomuphatusaaye?

¹⁸ Naari oorumeyellaaye khanaaroromella angelwaaye annaaphwanyella mullatu.

¹⁹ Mwawiidde muthu awoopiwa ni olloko, oyo matthipellwaaye tti ethaya, oyo anaanyenyeye wonanko enjenjete.

²⁰ Variyari va ohinase ni misikuwa annanyenyeya, annoonongeya, oohuupuwelliwattho ni muthu.

²¹ Ethiyo ddittheddene eriiwana kheddinamallella nimodda? Ennakhwa koma moohikhalla ni ezeru.”