Yobu 39 - Mawu a Mulluku

¹ Ethiyo onnadduwella enthawi eyo anaahe enarelliiwa? Ethiyo waambilleke oddoona epaalla ddiyariwaka?

² Ethiyo ttuuweerenga miyeri nnddo ddinakhalliiwa ddiitumalle apaalle onnadduwella enthawi eyo ddinarelliiwa,

³ ddinakokhoriiwa, ddinaarelliiwa asaaniiwa nave mvo ddiniithuuwiiwa?

⁴ Asaana a enamanndda ennunuwa mwamasiva muhakani, vatulli viwa ennavenyavo, oohihokollweella wa ameewa.

⁵ Ttaani addeerihalle mbizi wi ddikhalleke ddoottaphuwa? Ttaani addeerihalle wi ddeeteeteke.

⁶ Kaaddivaha muhakani wi mukhalle muwaniwa, ethaya yamwiinyu wi ekhalle vookhalla viwa.

⁷ Ddinnattheya ntapha na m'mizindani, khaddiniiwa okhuwa wa aweetiha magareta.

⁸ Omwaangoni sika woocha wiwa, nko ddinaashaashiiwa orive munyepu.

⁹ Ethiyo enari ttuuwaakhullella wuurumeyella apaalle ttuukona munikhollani mwawo mahiiyu?

¹⁰ Ethiyo ttuuyimaka enari ni mikwe wi ellimeke apaalle ttuuwuuthwara nngu yuungaka mizere mutapo?

¹¹ Ethiyo ttuuroromella enari ekaamba ya masiviiwa, apaalle ttuuyihiyera muttekwaawo?

¹² Ethiyo ttuuroromella wi olliye ttuutthukumanihella mmiddwaawo vanipuroni nawo nawuuputhella?

¹³ Enthiwatiwa annapukusa muuphello moohakallalla, koma ethiyo ni muuphellwaaye ttuuvava wonanko nasekwa?

¹⁴ Enthiwatiwa annaavuhella moochaaye vatthi, annaahiya wi epuramelliwe ni ethaya.

¹⁵ Annatiwalla wi ni manyallo ttuupwesa, wi enama ddamuhakani ttuuwaanyingallella.

¹⁶ Enthiwatiwa annaweerella ekuku asaanaaye wonanko khe aaye, khanapwathawo ddawi ohoowa vawaayarani khokhalla ni mutteko.

¹⁷ Valle miyaano Mulluku kaamwiimana ezeru, ngaamuvahille wiiwesesa erive ello.

¹⁸ Koma enthiwatiwa aamba othamaka, annamuttheya kavalo ni oowellavwaaye.

¹⁹ We Yobu, ethiyo ttuumuvaha kavalo masiva apaalle ttuumuwariha manyenje mukohi mwaye?

²⁰ Ethiyo onnamulluphiha wonanko muddope? Ovuma waye mookota tti wawoopopiha!

²¹ Annavarittha vatthi mutapo ahakallallaka, ni masivaaye annathamakella okhotoni wi akumanena ezida.

²² Khanoova ello nave khanakukhumulleya, khanahokollweella mutulli oona nsupada.

²³ Munigoneloni mwa oowellavwaaye muninlla ngwinjiri vakhakaddani vaye, momba ni nivaka ddinneera ng'aning'ani.

²⁴ Vootthukumellani ni owalli kavalo annathamaka mwawaakuva, iiwa winlla wa nipallapata annattatthamuwa.

²⁵ Nipallapata ninlla anneera “ii!” Annunkherera ekhoto ari voorekama, othuruma ni okhuwa wa oohoollella.

²⁶ Ethiyo neekhwaambe anavava ni ezeru ddawo aattaphurusaka muuphellwaaye oya omwera?

²⁷ Ethiyo tti we onalamula mpungu wi ovaveke, wi omakeke emphurwiiwa vaddullu?

²⁸ Annakhalla nave annakona vanllukuni, anamaka emphurwaaye vaddullu.

²⁹ Ovenyera vaavo annaashaasha yoocha, miitthwaaye ennayoonella voorekama.

³⁰ Anaaye ennawirya nikhame, anaphwanyeya nko ori mitembo.