Yobu 38 - Mawu a Mulluku

Apwiya enamwaakhulla Yobu

¹ Vano Apwiya yaamwaakhulla Yobu oweella mu namangalle wi,

² Ethiyo ttaani ananariha malangizo ni mawaaye oohikhalla ni ezeru?

³ Khozeka moollipa wonanko mullopwana, kineerewuukoha nave okaakhulle.

⁴ Ethiyo waakhallavo katthipelleemi ellapo yavatthi? Killeelle waarimi ori oodduwellesesa ddeko.

⁵ Ethiyo onnamudduwella oyo alembelelle maliriiwa apaalle ttaani alingalle ni mukwe ellapweeyo?

⁶ Ethiyo matthipellweene yakatelliwe vawiidde apaalle ttaani iikaatthille nlluku noopaalleyesesa

⁷ Valle etheneeri ddoohinase ddiipiiwa vamodda nave anamwani aallopwana a Mulluku yakhuwiiwa moohakallalla?

⁸ Ethiyo ttaani ayiwallenlle enyanja ni machiwi, valle yaphulleyilliiwa wonanko enakhuma mwiirukulluni?

⁹ Tti miyaano kayihuruwelle enyanja ni mirapo, kaayiwariha epiphi wonanko yoowara.

¹⁰ Kaayilembella malire enyanjeeyo, kaayihiyella machiwi oowalliwa ni mikoko ddoollipa.

¹¹ Sika kaallota wi, “Ophiye mvo ohikhwaranyevo, enaakomelle vaava mafundaawo awiitukhullaayo.”

¹² Ethiyo waambilleke olamula nndduwa wi nikhume ohinase ni wi ohinase okhalleke ni nipuro niwa?

¹³ Ethiyo waambilleke olamula wi ohinasenko omolleelle ellapo yavatthi wi waathawihe athu oonanara awiipittha vaavo?

¹⁴ Miyaango ni matapo ddinnooneya ekaamba ya owala wa otthaana wonanko mahoonya a ddoowara, wonanko echidindo voollokoni.

¹⁵ Owala wa otthaana khonaaphiyera athu oonanara, muwono wookhozekella ekuku onnaphaddiwa.

¹⁶ Ethiyo waavollowamo mu aneetuutu a enyanja apaalle waheeta vatthivatthi viwa voowallamella?

¹⁷ Ethiyo wahuupullullelliwa millako dda okhwa apaalle wohoona millako dda epiphi yoottikana?

¹⁸ Ethiyo onnadduwella oramballalla wa ellapo yavatthi? Killeelle waarimi odduwenlle.

¹⁹ Ethiyo owala onavenyera ettilla eevi nave owaniwa wa epiphi tti wuuwi?

²⁰ Ethiyo we ttuuddivelleella ddenndda o ellapwiiwa apaalle ttuudduwella ettilla yooyeella owaniwa?

²¹ Onnadduwella vawi waari oyariwe nave mallapo a okumaawo tti manchichi!

²² Ethiyo woovollowa mu enyumba ddoosungellamo nakhuttu apaalle wohoona mmo enasungelliiwa marallalla?

²³ Ddenndda kiddisungenlle enthawi yookatamiha, va nllapo noowana ni nakhoto.

²⁴ Ethiyo eri wuuwi ettilla yooyeella onakawiwa owala apaalle nipuro onamwariwa ephevo ya wookhuma nndduwa?

²⁵ Ethiyo ttaani anallima musewu wooweella murimu apaalle ollima ettilla ya ettari?

²⁶ Ttaani anammoriha murimu va nipuro noohikhalla athu, o echipululu woohikhalla arive muthu?

²⁷ Ttaani anahellella ethaya yawumma yeechipululu ophiyera wi ennamella manasi?

²⁸ Ethiyo murimu ookhalla ni attiitthinnya apaalle ttaani ayarille nikame?

²⁹ Ethiyo nakhuttu akhumme mu erukullu yawani nave ttaani amuyarille ovenyera oddullu,

³⁰ oyo anummiha maaddi wonanko nlluku, anapharaaniha kokoto maaddi a va enyanja?

³¹ Ethiyo we ttuumaka etheneeri dda Thanda apaalle ttuuttaphulla mikwe dda Amuhomekiwiiphe?

³² Ethiyo we ttuuddookollella etheneeri munthawini mwiwa apaalle ttuuhoollella Thanda vamodda ni anaaye?

³³ Ethiyo onnaadduwella malamulo a oddullu, olamulellwiiwa ttuweetihella ellapo yavatthi?

³⁴ Ethiyo we ttuuddikhuwella mirapo wi maaddi a murimu yuunaanihe?

³⁵ Ethiyo we ttuulamula ettari wi ddisherime nave ewaakhulla wi, “Nilamuleni”?

³⁶ Ethiyo ttaani ahiyalle ezeru m'miraponi, ttaani innyalle wiiwesesa etheneeri yootthomowa?

³⁷ Ethiyo eezeru ttuuweerenga mirapo apaalle ttuupitulla mino ddooddullu,

³⁸ wi nthupi nitthattuwe matokwi, ethaya epharaane vamodda.

³⁹ Ethiyo ttuuwusayella yoocha mukango apaalle ttuumalliha ettalla ya asaana a mikango,

⁴⁰ yaawiipitthaka m'makhunguni mwiwa apaalle yaatiyerellaka m'makonello mwiwa?

⁴¹ Ttaani anamvaha nakhuku yoocha, anaaye yinllellaka wa Mulluku, yaahahareyaka vooramani yoocha?