Yobu 37 - Mawu a Mulluku

¹ “Murimaaka onnatthukumella ni ddenndda, onnalluphamo munipuroni mwiwa.

² Mwiiwesese phaama ogugudeya wa mawaaye, othuruma woovenyera muwano mwaye.

³ Annarumiha ettari ovenyera oddullu, ennaphiya wookomella ellapo yavatthi.

⁴ Vatulli viwa othuruma wa Mulluku onniiweya, anneengeresa ni mawaaye muullupalli ettari ddisherimaka.

⁵ Mulluku annathuruma moottikhiniha ni mawaaye, anneera dduullupalli ddoohiiweseseya.

⁶ Vawi annamulamula nakhuttu wi, ‘Morella va ellapo yavatthi’, ni murimu wi, ‘Rupa mwamasiva.’

⁷ Mulluku anniimesa mutteko wa arive muthu wi athu attheene edduwelle mitteko ddaye.

⁸ Vaavo enama ddinnathawella omakonello wiwa, ddinniipittha m'makhunguni mwiwa.

⁹ Namangalle annoopa ovenyera o nipuro naye, ephevo ennawiiha oriirya.

¹⁰ Mu ovuma wa Mulluku munnavenyera nakhuttu, maaddi manchichi ennapharaana mwawaakuva.

¹¹ Annawureya munyezi murapo woottikana, annapallallesa ettari ovenyera m'miraponi.

¹² Mulluku annaddeetiha mirapo mwawaapheella, wi ddikwakhwanihe ddoolamula ddaye ddittheddene va ellapo yavatthi.

¹³ Annavumiha murimu wi ahellelle ellapo wi anillake hiyaano apaalle wi anoonihelle echikondaaye.

¹⁴ We Yobu wiiwesese nndda, imella oganizere mitteko ddoottikhiniha dda Mulluku.

¹⁵ Ethiyo onnadduwella mmo Mulluku anaddilamulelleeye mirapo, mmo anasherimihelleeye ettari?

¹⁶ Ethiyo onnadduwella mmo Mulluku anaanddellelleeye mirapo, ddoottikhiniha dda oyo ari ni ezeru ddoowallamella?

¹⁷ Ethiyo munniiwa oviha ddoowara ddanyu, ephevo yoomwera yaawoopaka veellaponi?

¹⁸ Ethiyo ttuuwora wonanko olliye ottaphurusa oddullu woollipa wonanko mukoko woopukutiwa phaama?

¹⁹ Onihuddihe ddawi nimulleelle olliye. Hiyaano khaninna yoollota kaambiiwa niri mwiipiphini.

²⁰ Ethiyo ttuumulleella Mulluku wi kookhalla ni mawu? Vawi onaphwanaphwana ni oveka omiryiwa.

²¹ Koma vano athu kheni ewehesese owala, waanyezimellaka wunchichi oddullu, ephevo yavira ni oshella mirapo ddittheddene.

²² Ovenyera ompoto annooneya oreera wonanko golide, Mulluku ookhalla ni olemu wawoopiha.

²³ Amasiva Mattheene khaniwora omwaatamella, tti muullupalli m'masivani ni mu echilungamo, tti oolungamesesa wawi khani ahoose.

²⁴ Sika athu ennamoova olliye, khanampwatha arive muthu oyo aniilleka wi tti eezeru.”