Yobu 36 - Mawu a Mulluku

¹ Elihu aavirellella ollota wi,

² “Mukitiyere vang'ono, kuulleelleni vawi kookhalla mawu munipuroni mwa Mulluku.

³ Ezeru ddaka ddinavenyera voorekama, kineerewooniha echilungamo wa Oophatusaaka.

⁴ Ddawoona, miyaano nginoottha, muthu oodduwellesesa ari variyari vanyu.

⁵ Mulluku tti amasiva koma khanamuvevulla muthu, ekaamba yawi annadduwella erive ello.

⁶ Khanaakhullella wi oonanara ekhalleve ni okumi, koma oohoosiwa annaweerella echilungamo.

⁷ Khanavenyihavo miitthwaaye va oolungama annaakhullella wi elamulelle monga mamwene, annaweeriha wi evahiweke olemu wa enthawi yoohimalla.

⁸ Koma athu yamakiwa ni anamang'ona, yakoliwa ni mikwe dda ddoohoosa,

⁹ sika aneerowooniha mitteko ddiwa ni ddoonanara ddiwa, nnddo eneeriiwa mwawiitukhulla.

¹⁰ Annaahulla maaru wi yiiwe malangizo nave annaalamula wi ehiye ddoonanara.

¹¹ Athu yamwiiwellella ni omurumeyella, ennamalliha mallapo a okumiiwa moodala, ennakokholla miyakha ddiwa moohakallalla.

¹² Koma yaahiiwellella, enaatthollowe ni nsupada nave enaakhwe ehidduwellaka ello.

¹³ M'murimani mwa oohimullapella Mulluku munnaddalla owalli, naari aamaka ni onyolo alliwa kheninllella nikavihero.

¹⁴ Enakhwa eri asombwe, okumiiwa onnamalla moowulliha muru.

¹⁵ Koma Mulluku annawaakiha oohoosiwa oweella mu ddoohoosannddo, annaahulla maaru vawaamorihella mu ddookatamiha.

¹⁶ Mulluku ahuukhumihattho mu ddoohoosa wi uuhiye va nipuro noottaphuwa, noohimakeya, vatebuloni vawo viddalle ddoocha ddamakhura.

¹⁷ Koma vano oniipiwa mullatu wonanko oonanara, echilungamo ni echiweruzo yohuuphara.

¹⁸ Chenjera wi ddamukaphwani ddihuukhuneelle miittho, apaalle wi eyuuma ehuuhollose.

¹⁹ Ethiyo eyuumaanyu ttuuwuukhumiha mu ddoohoosa, apaalle waata wa masivaanyu ttuuwuvullusa?

²⁰ Ohipaalleke wi mahiiyu ephiye, mvo mitundu dda athu ddinoonongiwiiwa.

²¹ Chenjela wi ohirukunuwelle o ddoonanara, vawi sika ekaambiiwa weesiweewe ni ddoohoosa.

²² Ddawoona, Mulluku tti amasiva muullupalli. Ethiyo vookhalla muhuddihi wonanko olliye?

²³ Ethiyo ttaani amulleelleke Mulluku yaweera apaalle omulleella wi olliye tti oolakwa?

²⁴ Upuwellaka oriiha mitteko ddaye, nnddo athu enaddiipelliiwa machipo.

²⁵ Athu attheene ennaddoona mittekonnddo, koma athwaayo enaddoonella woorekama.

²⁶ Ngoonani, Mulluku tti muullupalli, khannamudduwella naari vang'ono, miyakha ddaye khaddinadduwanyeya.

²⁷ Mulluku annaawelliha maaddi muddullu, aatthattusa murimu.

²⁸ Mirapo sika ddinammimina murimu, annaarupella athu mookwakhwana.

²⁹ Ethiyo ttaani anadduwella dda waanddellelliwa wa mirapo, apaalle dda ogugudeya wa murimu nko onakhalla Mulluku?

³⁰ Ngoonani mmo anattaphuruselleeye ettari koma annakhuneella vatthi va enyanja.

³¹ Mmu sika aneeruzelleeye mitundu dda athu, annavelleella yoocha yinchichi.

³² Annaphara ni mattaaye ettari, annalamulattho wi ddimorelle mvo anapaalleeye.

³³ Ogugudeya onnallalleya dda owa wa ephevo yawoopiha, naari eng'ombe ddinnadduwella wi enimawa.”