Yobu 35 - Mawu a Mulluku

¹ Elihu aavirellella ollota wi,

² “Ethiyo Yobu, onaganiza wi ddenndda tti ddawoona voollotani wi, ‘Kiri oolungama omukhwaranya Mulluku?’

³ Komave onakoha wi, ‘Mulluku, ethiyo onaaphurevo tini? Ethiyo kaarimi kihichimwalle kinaatotevo tini?’

⁴ Kineerowaakhulla weyaano ni akhwaawaalla.

⁵ Ngawehani oddullu moone, onani asimirapo muddullu mwanyummo.

⁶ Ethiyo mwaachimwaka munamvudda Mulluku? Mwawoonjereraka machimwaanyu ddinamuvoreya mwawiidde?

⁷ Mwakhalla oolungama, olliye munamwinnyavo tini? Apaalle olliye anatotavo tini?

⁸ Onanara wanyu onnaahoosa athu echilungamwaanyu ennaaddivella athu amodda.

⁹ Athu eniminlla ekaamba ya waata wa ddoohoosa, enaveka nikavihero ekaamba ya opaniwa ni athu amasiva.

¹⁰ Koma khaavo oollota wi, ‘Ethiyo ari wuuwi Mulluku, Ookiphatusaaka, oyo ananiipiha nchipo moohakallalla variyari va mahiiyu,

¹¹ oyo ananihuddiha okhwaranya enama dda veellaponi, oyottho ananivaha ezeru okhwaranya epallame ddamuddullu.’

¹² Ennamwinllella Mulluku koma khanawaakhulla, ekaamba ya wiitukhulla wa oonanaraayo.

¹³ Ddawoona, Mulluku khaniiwa oveka woohikhalla ni mutteko, Amasiva Mattheene khanapwatha ddennddo.

¹⁴ We Yobu, onallota wi khonamoona Mulluku, komave olliye sika aneeruze mullatwaawo nave onnamutiyerella olliye wi akamulle.

¹⁵ Nave onnallotattho wi owallaaye khonallaka, khanapwathesesa ddoonanara.

¹⁶ We Yobu eyanwaawo ennallota ddoohikhalla ni mutteko, moohidduwella onnoonjerera ddoollota.”