Yobu 34 - Mawu a Mulluku

Mawu aneepiilli a Elihu

¹ Elihu aavirellella ollota wi,

² “Mwiiwe mawaaka, nyu athu eezeru, mwaapelle maaru, nyu oodduwella ddeko.

³ Vawi naaru niniiwesesa mawu, wonanko muwano munallawihelliiwa yoocha.

⁴ Hankoni nitthoolle yoolungama, niphwanye weekhiihu yaphaama.

⁵ Vawi Yobu anallota wi, ‘Kiri oolungama koma Mulluku ookaakha echilungamwaaka.

⁶ Naari keeraka ddawoona, kineesiwa awoottha, nikhwata naka tti noohivolla naari kihichimwalle ello.’

⁷ Ethiyo ookhallavo muthu oophwanaphwana ni Yobu, oowirya epewe wonanko maaddi?

⁸ Anathaanana ni aweera ddoonanara, anaattana ni athu oochimwa.

⁹ Olliye aallota wi khaviri mphuro muthu aahakallallaka mwa Mulluku.

¹⁰ Vano iwani, nyu athu eezeru, Mulluku khaneera yoonanara, Amasiva Mattheene khanalakwiha.

¹¹ Annamuhokollosella muthu moollikana ni mitteko ddaye, annammorihella muthu moollikana ni meetellwaaye.

¹² Ddawoona, Mulluku khaneera yoonanara, Amasiva Mattheene khaneeruza moohilungama.

¹³ Ttaani amwinnyalle odindo woolamulella ellapo yavatthi? Ttaani ahiyalle m'mattani mwa ellapo yavatthi ettheene?

¹⁴ Mulluku eeki uupuwelle yeekha m'murimani mwaye, eeki iitthukumanihelle yeekha munepaaye ni mpweyaaye,

¹⁵ ddaano ddookumi ddittheddene ddonongeyille, ddaano athu attheene ehokollweelle onthupini.

¹⁶ Mwaarimi mwiiwesesaka, iwani nndda, mwaapelle maaru phaama ddoollota ddaka.

¹⁷ Ethiyo awiitana ni echilungamo ttuulamulella? Ethiyo nyu ttuumweeruza Oolungama ni Amasiva Mattheene,

¹⁸ oyo annamuhumullulla mwene wi, ‘Khonna mutteko,’ oyo anayihumullullattho enduna wi, ‘Muthu oonanarawe?’

¹⁹ Olliye khanaakondella oolamulella apaalle waariiha eeyuuma okhwaranya oohoowa vawi attheenaayo tti mutteko wa mattaaye.

²⁰ Moorurumusa ennakhwa naari variyari va mahiiyu, athu enneengereya enarowa, annawaakha okumi moohikatamiha athu amasiva.

²¹ Miitthwaaye eri va ettilla dda muthu, annawehesesa meetellwaaye mattheene.

²² Khawuri mahiiyu apaalle epiphi yoottikana nko enaaworiiwa wiipitthawo aweera ddoonanara.

²³ Khonapaalleya wa Mulluku okeraatthiha enthawi yawi arive muthu aphiye vamiitthoni vaye wi eeruziwe.

²⁴ Olliye annaakitthiha amasiva, ahineeruze naari vang'ono mullatwiiwa, munipuroni mwiwa annaavollochihamo amodda.

²⁵ Olliye annadduwella phaama mitteko ddiwa, annawuupurusa mahiiyu ophiyera ennaanyenya.

²⁶ Annaallaka ekaamba ya onanara wiwa, vaweella, athu attheene yoonaka

²⁷ vawi yaahiya omuthwara, ohipwatha ettilla ddaye ddittheddene.

²⁸ Yaaweeriha oohoowa winllella wa Mulluku, olliye ahiiwa winlla wa oopaneya.

²⁹ Mulluku eera tuu, ttaani anaamuhumullulle? Iipitthiha ekhovaaye, ttaani anaamoone? Komave olliye sika annaawehesesa athu apaalle mitundu dda athu

³⁰ wi oohimoova Mulluku ahaalamulelle wi ahaamake vamusamphani.

³¹ Aahikhallavo muthu amulleellille Mulluku wi, ‘Koovillella ddoohoosa, ngaakullella ochimwa.

³² Mukihuddihe nnddo kihinaddooneemi, kaarimi keerille yoohilungama, ngiwa keeraattho.’

³³ Mulluku ttuumullaka monga munapaallelleenyu? Vawi munimakhoota nnddo Mulluku aneereeye. Nyu muthoolle oohikhalla miyaano, sika mullote nnddo munadduwelleenyu.

³⁴ Athu awiiwesesa eneerokilleella, athu eezeru anakiiwa miyaano eneerollota wi,

³⁵ Yobu anallotella ohidduwella, mawaaye khenna ezeru.

³⁶ Waphaama Yobu eesiweke ophiya o mamallihello, kaambiiwa anaakhulla wonanko athu oonanara.

³⁷ Va nichimo naye annoonjereravo owukila, anniitukhulla ni mitteko ddaye vamiitthoni vahu, annoonjerera mawu oomuvevulla Mulluku.”