Yobu 33 - Mawu a Mulluku

¹ Koma vano we Yobu, iwa mawaaka, apella maaru o ddoollota ddaka ddittheddene.

² Ngoona, kirina ottaphulla vayanoni, nllumi naka ninimallota.

³ Mawaaka enooniha oreera wa murimaaka, odduwella woovenyera vayanoni vaka tti wawoona.

⁴ Munepa a Mulluku ookiphatusa miyaano, mpweya wa Amasiva Mattheene onnakivaha okumi.

⁵ Kaakhulleni mweeki muwore, khozekellani phaama wi mwiimelle vamiitthoni vaka.

⁶ Ddawoona, kiri monga nyuwaano vamiitthoni va Mulluku vawi miyaanottho koopiwe ni olloko.

⁷ Muhoove ni woopopiha waka nguureyani ello yoollemella.

⁸ Ddawoona, kohiiwa ddoollota ddawo, kohiiwesesa phaama mawaawo.

⁹ We enallota wi, ‘Mi tti aweella, nginna yoolakwa, miyaano tti oolungama, nginna nichimo.

¹⁰ Komave Mulluku ookiphwanyella mullatu, anakeesa miyaano mudanaaye.

¹¹ Ohaamaka manyallwaaka ni namang'ona annakithwara manyallo orive weko.

¹² Yobu, kinuulleella wi khawenre ddaphaama vawi Mulluku tti muullupalli omukhwaranya muthu.

¹³ Ethiyo onavaanyihellana tini ni olliye wi khanaakhulla erive mawu a muthu?

¹⁴ Vawi Mulluku annallota moohiyanahiyana koma muthu khaniiwesesa.

¹⁵ Moollohani, mu masomphenya a mahiiyu, athu ekhwillevo ni ekhove, athu ekwindimaka vabedini viwa,

¹⁶ vano annaahulla maaru athwaayo, annawoopopiha ni waachenjeza.

¹⁷ Aneera nndda wi amurukunuse muthu o mitteko ddaye anapaalla wi okota wa muthu omalle.

¹⁸ Annamwaakiha muthu wi ahimorelle munllitini, annateteza okumaaye wi ohoonongeye ni nsupada.

¹⁹ Annamullakattho muthu ni ddoovoreya vabedini vaye ni opwesa woohihiyerera wa m'makhuvani.

²⁰ Sika muthooyo yoocha ennamweetiha murima khanakhallella munkhella yoocha.

²¹ Mwiillaaye onnoonda moohiweheya, okhwaranya khalle, makhuvaaye enakhalla vaweella.

²² Okumaaye onnaatamella o mahame, ari vakhuviru oya o ellapo ya ookhwa.

²³ Vaamodda ttuukhallavo mungelo, ookhalla variyari, mmodda a angelo ooheerengeya, awooniha wi muthu tti oolungama.

²⁴ Mweechifundo mungelooyo ttuullota wi, Muttaphulleni wi ahimorelle munllitini, koophwanya yoomoopollella olliye.

²⁵ Mwiillaaye osalalettho monga wa mwaana, ahokollweelle mallapo a esombwaaye.

²⁶ Muthooyo avekella, Mulluku annaakhulla, annawa vamiitthoni va Mulluku moohakallalla nave Mulluku annamuhokollosella echilungamwaaye.

²⁷ Vano muthooyo aneerewiipa wa amodda wi, Kaachimwa, ngeenre ddoolungama koma ngaahokolloselliwe moollikana ni mitteko ddaka.

²⁸ Ahoopolla okumaaka wi ohimorelle munllitini, miitthwaaka eneerewoonattho owala.

²⁹ Ddawoona, Mulluku anneera ddittheddenenndda, opiilli naari oraru, wa muthu,

³⁰ waakiha okumi wa muthu wi ahimorelle munllitini wi awore woonattho owala wa okumi.

³¹ Yobu vano apella maaru ddoollota ddaka, weere ellapo tuu wi miyaano killote.

³² Wakhalla ni mawu kaakhulle, llota vawi kinapaalla koone echilungamwaawo.

³³ Waahikhalla ni mawu, kaapelle maaru, weere ellapo tuu wi kuuhuddihe ezeru.’ ”