Yobu 31 - Mawu a Mulluku

¹ Kaakeraatthiha echipangano ni miitthwaaka, ngiwa kimuweha namwalli moomusilila.

² Ethiyo echigawaaka ttiivi ovenyera wa Mulluku oddullu? Ethiyo yoohallanaaka tti tini ovenyera wa Amasiva Mattheene ooddullu?

³ Ethiyo otulli khonaamorella oohilungama, echiwonongeko aweera ddoonanara?

⁴ Ethiyo Mulluku khanoona ettilla ddaka ni othwara manyallwaaka mattheene?

⁵ Miyaano ngeetille ettilla ddawoottha apaalle manyallwaaka othamakella olleka.

⁶ Mulluku akilinge va esikelo yoororomelleya, adduwelle wi miyaano kiri oohichimwa.

⁷ Manyallo yahiya ettilla, murimaaka wasilila moonanara, mattaaka yaripihiwa ni ddoonanara,

⁸ vano muhiye wi mmiddwaaka otulliwe, ni wi amodda eche ddoollima ddaka.

⁹ Murimaaka wakuseya ni mutthiyana, kiipittha otiyerella va mullako va mukhwaaka,

¹⁰ vano mwaaraka amusillelleke mmodda, olliye akoneke ni allopwana amodda.

¹¹ Vawi yoolla waakhalle mullatu woowulliha muru, yoonanara yoophwanella ollakiwesesa ni aweeruza.

¹² Vawi tti wonanko mallumi amunllo ophiya o gehena, wooshellelliha vamodda ni misisi ddittheddene kiriimina.

¹³ Kaarimi kivevullalle mullatu wa oorumeyellaaka aphiyalleeye vamiitthoni vaka ovaanyihana ni miyaano,

¹⁴ kineere tini Mulluku vootthupulluwani, kinaallote tini vookiipani mullatu?

¹⁵ Ethiyo khe mmoddave yooyo akipangille miyaano ni olliye? Ethiyo khe mmoddave oyo aniphatusalle attheenehi mwiirukulluni mwa ameehu?

¹⁶ Ngaawiimanille oohoowa ddoopaalla ddiwa apaalle waaphariha nlluku anaamukhwelle

¹⁷ apaalle ocha ethokwaaka meekha, oohaallawihiha akhwaadduni

¹⁸ vawi ovenyera esombwaaka kaanaallella wonanko attiitthiiwa, kaanaapwatha ovenyera oyariwa wiwa.

¹⁹ Kamoona muthu apaallaka yoowara, apaalle ahinna yawiikhuneella,

²⁰ kaanamuvaha yoowara yooviha yoobweya, ekuwo yoovenyera o enkhosa ddaka, sika aanathokoza ni murimaaye muttheene.

²¹ Kaarimi kitukhunlle nnatta omoopopiha mukhwaadduni, voororomellani wi mullatu oneerokeetella phaama,

²² vano nthuri naka nikurukunyuwe, muwonwaaka okhwadduwe vanthurini.

²³ Vawi kinnoova otulli woovenyera wa Mulluku, nginawora weera ello ekaamba ya ottekweenaaye.

²⁴ Ngihiyalle murimaaka va eyuuma apaalle omuroromella golide aphaama.

²⁵ Ngaahakallanlle ekaamba ya eyuumaaka yawaata apaalle ekaamba yawi mattaaka yaaphwanya ddinchichi.

²⁶ Nginallapelleke nndduwa noopaka apaalle mweeri owanle mooreera.

²⁷ Murimaaka khonallekiweke, vooshoshonani nnatta naka.

²⁸ Nna naakhalle nichimo naweeruziwana vawi kaaphwanyeye awoottha wa Mulluku ooddullu.

²⁹ Ngaahakallanlle ni otulli wa mudanaaka, ngaattheyille ddoohoosa ddammorenlliiwa.

³⁰ Ngaachimwalle ni vayanoni vaka voomutembelelani mudanaaka wi oonongeye.

³¹ A munibanjani naka ennadduwella wi khaavo ahillawihalle yoochaaka.

³² Mullakwaaka waari woohulla wa alleto, khaavo kamukonihalleemi vaatte.

³³ Ngiipitthihalle ddoonanara ddaka monga eneerella athu, ngivitthalle machimwaaka m'murimani mwaka.

³⁴ Ngoova ddoollota dda milloko dda athu, ngaatthukumella ni ddeepewe dda mabanja mamodda, ngiiwallenlle mpa ekaamba ya alliwa.

³⁵ Ha, kaariki ni mmodda ookiiwa! Kinimallupella wi kinallota ddawoona, Mulluku Amasiva Mattheene akaakhulle! Weerokhalla phaama mudanaaka alembilleke wonanko kalata mullatu oyo anakiipeeye.

³⁶ Ddawoona, keerewiireya kalatooyo vanthurini vaka, keeromuwara wonanko enduwira yoomwene.

³⁷ Keeromutthopoollella Mulluku mitteko ddaka ddittheddene, keerophiya vamiitthoni vaye wonanko mwene.

³⁸ Emataaka yaarimi yaambilleke okinllella apaalle mikhuttu ddiwa omoriha miitthori nimodda,

³⁹ kaarimi kichille dda m'matanimmo kihinayikulle apaalle waatathilliha murima allupa emateeyo,

⁴⁰ mumelle miiwa munipuroni mwa tirigu nave nansongole munipuroni mwa barele. Mawu a Yobu emallelle vaava.