Yobu 30 - Mawu a Mulluku

¹ Koma vano enimakittheelliha ayo eri anamwani wa miyaano, ayo attiitthiiwa kaavevulleemi, oohiweesa oophwanella ophara mutteko vamodda ni anapwa oowehera eziweto ddaka.

² Ethiyo kaphunrena tini masiviiwa, athu ayo ekophollo ddiwa tti ddoomallamalla?

³ Ekaamba ya ohoowa ni ettalla, yaanacha ddawumma muchipululuni mwiipiphini.

⁴ Yaanakota erive makukhu, yaanacha misisi dda muteekho wa namushelloshello.

⁵ Yaaniikarihiwa variyari va akhwiiwa, yaanakhuwelliwa wonanko allupaawiiya.

⁶ Yaanawatiheriwa okhalla m'mihinjeni ddawumma, m'mallukuni ni m'makhunguni a vatthi.

⁷ Yaaninlla wonanko enama ohakani, enaphitteerana vamodda m'makukhuni oottorokana.

⁸ Anamwani ookarangeya, oohikhalla ni nnddina, yahiikarihiwa ni owashulliwa mwiillaponi.

⁹ Koma vano kootthattuwa echipwiiwa, kookhalla yoottheellihiiwa.

¹⁰ Ennakivevulla nave ennakirekamella, moohikayikella ennayittaphera ekhovaaka.

¹¹ Ekaamba yawi Mulluku aakifookiha ni okivevulla, aakirukunuwella mookishella murima wunchichi.

¹² Onnattanatta waka eekuku ennakiwukila, ennakiikariha virive veko, ennakhoza ettilla ddawi ekitthollose.

¹³ Ennoononga ettillaaka, ennawora okoononga, moohikaviheriwa ni arive muthu.

¹⁴ Ennawa wonanko oovollowella voophovowa, enniipurullave variyari va ddookumuwa.

¹⁵ Ddawoopiha ddoomorihelliwa va miyaano, olemwaaka woovavihiwa wonanko ephevo, eyuumaaka yoothiima wonanko murapo.

¹⁶ Vano murimaaka wookhumamo, enthawi ya ddookatamiha yookiphara.

¹⁷ Makhuvaaka ennakipwesa mahiiyu, ovoreya onnakiwenya moohivumella.

¹⁸ Mwa masivaaye Mulluku ookikoka ddoowara, annakimaka wonanko nikohi na mukanjwaaka.

¹⁹ Ookivokhella m'matokwini, kiri wonanko nthupi ni ntuura.

²⁰ Nyu Mulluku, kinnawinllellani koma khamunakaakhulla, kinnavekella koma khamunakipwatha.

²¹ Mookikhallella ekuku, munnakihoosa ni nnatta nanyu namasiva.

²² Munnakitukhulla ni okeetiha veephevoni, munnakivokhella mu namondwe awoopiha.

²³ Vawi kinnadduwella wi munakiyaana wuukhwaani, o nipuro wookumanella ookumi attheene.

²⁴ Koma ethiyo muthu ootulli khanattaphurusa muwono? Ethiyo khaninllella nikavihero voohoowani?

²⁵ Ethiyo ngawinllelle a mu ddookatamiha? Ethiyo ngaawamorenlle ethakaraka athu oohoowa?

²⁶ Koma vootiyerellani ddaphaama, ddoonanara ddaakimorella, vootiyerellani owala, epiphi yaakihuruwella.

²⁷ Murima onnakivoreya mooramiha murendelle, mallapo a ddoohoosa aakimorella.

²⁸ Kinneeta mwiipiphini moohikhalla nndduwa, kinniimella va mutthukumano oveka nikavihero.

²⁹ Kootthattuwa mmbale a akhatwe, mukhwaaye a enthiwatiwa.

³⁰ Nttapara nohaamba oripa ni ophinyuwa, makhuva ennakipwesa ni ovihiha mwiilli.

³¹ Gitalaaka ootthattuwa awinllella maliro, echitolilwaaka enahimaana ni awinlla.