Yobu 3 - Mawu a Mulluku

Okhupanya wa Yobu

¹ Vatulli viwa Yobu aattaphulla vayanoni vaye aamba otembelela nllapo naye nooyariwa.

Yobu

² Vano Yobu aallota wi,

³ “Nitembeleliwe nllapo nne kayariweemi navettho mahiiyu alle wallotiwe wi, ‘Yookusiwa erukullu ya mwaana aamullopwana.’

⁴ Nllapo nenne nitthattuwe neepiphive. Mulluku oddullu ahinipwathettho, owala ohinimolleellettho.

⁵ Nikhalle nllapo na epiphi ni na muuthuuchi wawoopiha, nihuruwelliwe ni murapo woottikana, noopopihiwe ni erive ello yooripiha otthaana.

⁶ Mahiiyu yaayo emiryiwe ni epiphi yoomakana, ehikhallettho va mallapo a vamuyakhani, eheerengiwettho vamodda ni miyeri.

⁷ Ha! Mahiiywaayo ekhalle oohiyara nave ellullu ddihiiweyemo.

⁸ Oodduwella otembelela nllapo, oodduwella omuvenyiha Leviyatani* etembelelettho mahiiywaayo.

⁹ Etheneeri ddiwa ddoohinase ddithiime etiyerelle owala nivuddove, ehoonettho naari owala wa ohinase.

¹⁰ Vawi kheyaawanlle nchiwi na erukullu wi kihiyariwe, okiipitthiha wi kihikumane ni ddoohoosa.

¹¹ Ethiyo kahiyariwelle tini ookhweene? Ethiyo kahikhwelle tini kiri oyariwa wene?

¹² Ethiyo makokhoro a amoowe yakaakhellelle tini? Ethiyo mapelliiwa yakaamwihelle tini?

¹³ Kakhwilleke vooyariwani, keerokonaatthi ellapo tuu, keerewiithuuwa mwamurendelle,

¹⁴ keerokhalla nimodda ni mamwene ni enduna dda veellaponimva, ayo yiimakenlle enyumba nnddo ollello tti matepe,

¹⁵ ddaano kikhallaka nimodda ni mamwene oovuwa ayo yaddallihalle enyumba ddiwa ni golide ni siliva.

¹⁶ Ethiyo kahikhallelle tini wonanko mutembo wa mwaana ookhote, wonanko akantchewa ehinooneke nndduwa.

¹⁷ Wenko oonanara khenakatamiha, ootopa enniithuuwa.

¹⁸ Wenko naari oomakiwa ennattaphuwa, kheniiwattho mawu a kapitawo.

¹⁹ Athu shisha ni oovuwa eri wenko nave kaporo annattaphuwa wa apwinnya.

²⁰ Ethiyo nndduwa ninamoopella tini muthu oohoowa? Ethiyo anavahelliwa tini okumi muthu oovoreyiwa murima?

²¹ Annatiyerella okhwa koma oohiphwanya, annaashaasha okhwaranya eyuuma yoovitthiwa,

²² annahakallalla ni ottaphuwa wunchichi, akhwa ni ovitthiwa mu mahame.

²³ Ethiyo enamoonihella tini owala muthu oowallelliwa ettilla oyo Mulluku amuwallenlleeye.

²⁴ Vawi miitthori sika yoochaaka, wiipullella waka khonamalla.

²⁵ Vawi nnddo kooveemi ddoheereya, nnddo katthukumelleemina ddookimorellave.

²⁶ Nginna murendelle, nginavuma, nginiithuuwa, ddoovoreya khaddinamalla.”