Yobu 29 - Mawu a Mulluku

Yobu anallota mwawiiteteza wookomihera

¹ Yobu aavirellella ollota wi,

² “Ha, waphaama kahokollweelleke mwakhalle, mallapo ayo Mulluku akiwehereeye,

³ enthawi eyo enyalaaye yamolleelliiwa va muru vaka, owala waye wakihoollelliiwa mwiipiphini,

⁴ mallapo ayo kaariimi muthumuthu, eyaattano ya Mulluku eri vaatte vaka,

⁵ valle Amasiva Mattheene aariiye ni miyaano, anaaka eri vakhwipimva,

⁶ enthawi eyo kawuhapeemi mukaka, mihinje dda makhura ddakhumiiwa m'mallukuni.

⁷ Valle kayeemi otte wa mullako wa muzinda, kakhozekelleemi ddookhallana va nthato,

⁸ asombwe yakoona yaanahapuwa, attekweene yaaniimella mookiriiha.

⁹ Mamwene yaanahiya ollota, yaanaphara vayanoni viwa.

¹⁰ Enduna ddaaneera ellapo tuu, muwano mwaanawumma.

¹¹ Arive muthu iiwalle dda miyaano aakeera oodalisiwa. Arive muthu akoonille aanakivaha olemu.

¹² Vawi kaamuvullusa oohoowa awinlla, mukhwaadduni oorama nikavihero.

¹³ Muthu oyo aari vakhuviru okhwa aakidalisa, naamukhwelle kaanamwiipiha moohakallalla.

¹⁴ Echilungamo yaari wonanko yoowaraaka, ddaphaama ddaka ddaari wonanko mukanjo ni enduwira.

¹⁵ Kaari miittho wa oohoona, meto wa oorakalla.

¹⁶ Kaari attiitthi a oohoowa, kaanatetezella phaama mullatu wa mulleto.

¹⁷ Kaawinttaka etwaatwara athu eekuku, kaanawaakiha oopaniwa owanoni wiwa.

¹⁸ Sika kaallota m'murimani mwaka wi, ‘Kinaakhwelle mpa mwaka, mallapo a okumaaka eneerewaata wonanko mihava.

¹⁹ Misisi ddaka ddoophiya m'maaddini, nikame nineerewimma va enthambaaka mahiiyu mattheene.

²⁰ Olemwaaka oneerovirellella okhalla mukitthi, muuraaka onaakhalleve musha m'mattani mwaka.’

²¹ Athu yaaniiwellella enatiyera, yaaneera ellapo tuu wi yiiwe malangizwaaka.

²² Kallota kheyaakhalla ni yoollota, mawaaka yaanaaphara murima.

²³ Yaanakitiyerella wonanko enamutiyerella murimu, yaanaatthamiha eyano wonanko enamutiyerella murimu awaallella.

²⁴ Kaawaamwetulellaka kheyaakhulupilila naari vang'ono, ekhovaaka yoohakallalla yahaallipiha mwiilli.

²⁵ Kahaatthoollella ettilla, kaari wonanko oohoollelliiwa, wonanko mwene variyari va akhotwaaye, wonanko awaakhurumusa awinlla.”