Yobu 28 - Mawu a Mulluku

Yobu anatthopoolla dda ezeru

¹ “Ddawoona, wookhalla mugodi wa siliva, owaaka nipuro noomweelliha golide.

² Mukoko onakatiwa ovenyera vatthi, mukuwa oneekiwa ovenyera o nlluku.

³ Athu ennayigonjiha epiphi, ennawaasha malluku ophiyera wookomella otthewene mwiipiphini yawoopiha ni yoottikana.

⁴ Ennaphovolla mugodi vatthi voorekamella voohiphiya nnyallo na muthu. Ennatiwalliwa ni athu aweeteeta, enniimakellella woorekamellana ni amodda, ennaapheella nngu ni nngu.

⁵ Ethaya ennakhumiha yoocha, koma vatthi viwa vinnarukunusiwa wonanko ni munllo,

⁶ nipuro niwa tti namalluku a safiro, nookhalla ni nthupi nagolide.

⁷ Ettilla yeella khenadduwelliwa ni neekhwaambe, naari ephangwi khenayooneke.

⁸ Enama ddawiitukhulla kheddinanyingallavo, naari mukango khonaviravo.”

⁹ “Muthu annaapwesa malluku oollipa, annapwanyulla miyaango ovenyera vamisisini.

¹⁰ Annaphovolla ettilla variyari va malluku, annaphwanya erive ello yoowallamella mutengo.

¹¹ Annaatiyella aneetuutu wi ehikhume, annadduupullullella vaweella ddeko ddawiipittheya.

¹² Koma ezeru ttuuphwanyeya wuuwi? Nave nipuro na odduwella niri wuuwi?”

¹³ “Muthu khanadduwella mutengo wa ezeru, khenaphwanyeya mu ellapo ya ookumi.

¹⁴ Maaddi owallamella ennallota wi, ‘Kheri mwa miyaano!’ Enyanja eni, ‘Kheri ni miyaano!’

¹⁵ Ezeru khenawora okulliwa ni golide, mutengwiiwa khonallikana ni siliva.

¹⁶ Golide a o Ofiri ni malluku a onikisi ni a safiro, mutengwiiwa khophwanaphwanana.

¹⁷ Ezeru khenallikana ni golide ni nigalasi, khenaakakhanihiwa ni golide aphaama.

¹⁸ Nihiromolle dda korali apaalle krisitali, mutengo wa ezeru onnakhwaranya malluku a rubi.

¹⁹ Malluku a topazi a o Kushi khenallikanana, naari mutengo wa golide aweellesesa khonaphiyavo.”

²⁰ “Ethiyo ezeru ttuuvenyera wuuwi? Nave nipuro na odduwella niri wuuwi?

²¹ Yohiipitthihiwa wa ddookumi ddittheddene, yootiitheya wa epallame ddoovava.

²² Woonongeya ni okhwa ddinallota wi, ‘Nohiiwa epillive ya ddennddo.’ ”

²³ “Mulluku sika anadduwella ettilla ya ezeru, annanidduwellattho nipuro niwa.

²⁴ Vawi annaweha ophiyera wookomella ellapo, annoona ddittheddene dda vatthi va mirapo.

²⁵ Akeraatthihalleeye masiva a ephevo, alingalleeye owallamella wa enyanja,

²⁶ akeraatthihalleeye lamulo na murimu, apotokosa ettilla dda ettari ni ogugudeya,

²⁷ vaavo aaddoona ezeru addeesa, aaddikeraatthiha, addisimikizella phaama.”

²⁸ “Sika aamulleella muthu wi, ‘Owoova Apwiya sika ezeru, othawa ddoonanara sika odduwella.’ ”