Yobu 27 - Mawu a Mulluku

¹ Nave Yobu aavirellella ollota wi,

² “Vamiitthoni va Mulluku Ookumi oyo akaakhille echilungamo, vamiitthoni va Amasiva Mattheene oyo akivoriihalle murima,

³ kaavirellellave ovuma ddiidda, mpweya wa Mulluku wakhallave mphunani mwaka,

⁴ eyanwaaka khekhumiha ddawoottha, nllumi naka khanillota ddoolleka.

⁵ Naari vang'ono ngaakhullella wi muri oolungama vawi ngitathilla ororomelleya waka ophiyera okhwa.

⁶ Kineerollipihellave echilungamwaaka, nginna yawiivaanyiha m'murimani mwaka.

⁷ Mudanaaka akhalle wonanko oonanara, oollipananaaka akhalle wonanko oochimwa.

⁸ Viri etiyerello yawiidde oohimoova Mulluku aphadderiwa okumi, Mulluku amwaakha okumaaye?

⁹ Ethiyo Mulluku ttuuwiiwa winlla waye ddookatamiha ddammorella?

¹⁰ Ethiyo olliye ttuuhakallalla ni Mulluku? Ethiyo ttuuvekella wa Mulluku enthawi ddittheddene?

¹¹ Kineerewuuhuddihani dda nnatta na Mulluku, yookhalla mwa Amasiva Mattheene ngiyiipitthiha.

¹² Vawi attheenenyu mooddoonella nyookha, vano yoollotella shisha tti tini?

Zofari

¹³ Alla sika mallivello a Mulluku wa oochimwa, yoohallana eyo owaahoosa akhwiiwa enaawaakhelliiwa ovenyera wa Amasiva Mattheene.

¹⁴ Anaaye yaateve mwawiidde, attheene enaamalle ni nsupada, edduullu ddaye ddineerorama yoocha.

¹⁵ Oohallaayo mullilli oneerewaavuhellella, naari winllelliwa ni anaamukhwelliiwa.

¹⁶ Naari atthukumaniheve eyuuma wonanko nthupi, apaalle uukellelleve ddoowara wonanko mihava,

¹⁷ koma oolungama sika enaaddiware, oohichimwa eneerokawana eyuumaaye.

¹⁸ Anamaka enyumba wonanko randasi, wonanko musasa woomakiwa ni mulonda.

¹⁹ Anakona ni eyuumeene koma okomihera tti wenko, vookhunuullani miittho, anaphwanya ehiivo.

²⁰ Ddawoopiha ddinammorella wonanko maaddi, mahiiyu ephevo yawoopiha ennamutukhullavo.

²¹ Ephevo ya wookhuma nndduwa ennamuvaviha oohooneyattho, ennamushella vanipuroni vaye.

²² Ennamoopa moohimmorella ethakaraka olliye vaweeseesani othawa mwawaakuva.

²³ Ephevweeyo ennamoopopiha, ennamuturumella ovenyera vanipuroni viwa.”