Yobu 26 - Mawu a Mulluku

Yobu anallota wi wunnuwa wa Mulluku tti woohiiweseseya

¹ Vano Yobu aallota wi,

² “Omukavihenre oohikhalla ni masiva mwawiidde? Ophanre muwono wa oohillipa mwawiidde?

³ Ethiyo omulangizalle mwawiidde oohikhalla ni ezeru ni omuvaha ezeru mookwakhwanella?

⁴ Ttaani aweerihalle wi otthopoolle mawu yaalla? Tti munepa wawani wuullotihalle ddenndda?

Bilidadi

⁵ Minepa dda ookhwa ddinnatthukumella, ni erive ello yam'maaddini a vatthi va ellapo.

⁶ Vamiitthoni va Mulluku, ellapo ya ookhwa kheniipittheya, nipuro na woonongeya khannakhuneelleya.

⁷ Voohikhalla ello annaanddellella eddullu ya ompoto, aannayitthomeya ellapo yavatthi.

⁸ Annaamaka maaddi m'miraponi ddaye, miraponnddo kheddinaphulleyana.

⁹ Annayikhuneella ekhove ya mweeri, annawuhuruwella ni murapwaaye.

¹⁰ Oolemba malire vamaaddini wonanko muura, oohiyaniha variyari va owala ni epiphi.

¹¹ Apoto ooddullu ennatthukumella, ennattikhina ni ohumullulla wa Mulluku.

¹² Ni masivaaye aamaalliha enyanja, ni ezeru ddaye aamoononga Rahabu.

¹³ Ni ovuma waye oddullu waheellihiwa, nnatta naye naahoma enowa yoothawa.

¹⁴ Nndda tti ddooyevave dda ettilla ddaye, ninniiwa vang'ono dda olliye moonong'ona. Vano ttaani aniiwesese dda ogugudeya wa masivaaye?”