Yobu 24 - Mawu a Mulluku

¹ Ethiyo Amasiva Mattheene aneeruze enthawi tini? Ethiyo oolungama ehinoonella tini mallapwaayo?

² Alliwa ennasusa malire, ennaakha eziweto wi ddikhalle ddayiwa.

³ Ennamwaakha bulu a mukhwaadduni, ennaakhattho eng'ombe ya naamukhwelle mwa echikole.

⁴ Ennaakakha oohoowa m'musewuni, oopaneya enniipittha nimodda.

⁵ Ennaashaasha yoocha muhakani wonanko embizi, khenna wowaaphwanyella yoocha aniiwa.

⁶ Alliwa ennuurulla m'matani mwa aneena, ennatota mu emata ddampesa dda oonanara.

⁷ Ennakona epwillimwinddive mahiiyu mattheene, khenna yawiikhuneella enthawi yooriirya.

⁸ Ennanaana ni murimu oomwaangoni, ennawanddeellella omakhunguni wi etiitheye.

⁹ Aakhallavo enawaakha akhwaadduni vanipelleni, ennaakusa echikole anamwani a oohoowa.

¹⁰ Oohoowa eneeta epwillimwinddive orama ddoowara, ni ettalleene ennatukhullihiwa mitolo dda tirigu.

¹¹ Enneeka makhura a olivi mu emata dda oonanara, ni nthona nene ennawamullihiwa mpesa.

¹² Ayo eri vakhuviru okhwa enniipullella m'muzindani, oophoreya enninllella okaviheriwa, koma Mulluku khanapwatha yoonanara.

¹³ Aakhallavo amodda enawukila owala, khenapwatha ettilla dda owalanko, khenathwara naari misewu ddiwa.

¹⁴ Ohinase eechiwembu annavenya wi awiiphe oohoowa ni oopaneya. Waripa annatthattuwa mullupaawiiya.

¹⁵ Ooraruwa annatiyerella osikuwa. Annallota wi, “Khaavo anaakoone.” Nave annayipitthiha ekhovaaye.

¹⁶ Awiiya enninttaka enyumba mwiipiphini, otthaana enniiwallella weekhiiwa, khenapaalla woona owala.

¹⁷ Wa attheenaalla epiphi sika ohinase wiwa, ddawoopiha dda mwiipiphini sika mwaattaniiwa.

Zofari

¹⁸ Oonanara annakusiwa mwawaakuva ni maaddi, emataaye ennatembeleliwa veellaponi, khaavo anayattho mu emataaye yampesa.

¹⁹ Wonanko mmo wumma ni oviha ddinattotthowihelliiwa marallalla, mmu sika ellapo ya ookhwa enamukuselliiwa oochimwa.

²⁰ Naari amennya eneeromutiwalla, miingu ddineeromucha moohakallalla, khawa uupuwelleyattho. Sika wonanko muteekho, oonanara anninttakeya.

²¹ Ennamuhoosa oohiyara ni oohikhalla ni mwaana, ennamukatamiha naamukhwelle.

²² Komave Mulluku mwamasivaaye annoonjerera okumi wa amasiva, annaallipiha mvo yaganiziiwa wi khekhalla ni okumi.

²³ Mulluku ttuuwaateteza oonanara, annaavaha murendelle, annawehesesattho ettilla ddiwa.

²⁴ Va enthawi yooyeva annaawelliha oonanara koma voohillekella ennarimeella. Oonanara ennanyaalla wonanko munyepu, annaphaddiwa wonanko makalla a tirigu.

²⁵ Ttaani vano anaakeere awoottha, wooniha wi mawaaka khenna mutteko?