Yobu 22 - Mawu a Mulluku

Okambirana waneeraru Elifazi

¹ Vano Elifazi Mutemani aallota wi,

² “Ethiyo muthu ttuukhalla amphuro wa Mulluku? Ethiyo muthu eezeru ddinchichi ttuukhalla aphindu wa olliye?

³ Ethiyo Amasiva Mattheene ttuuhakallalla ekaamba ya echilungamwaawo? Ethiyo apaalle olliye ttuuphuravo ello va makhallellwaawo aphaama?

⁴ Ethiyo tti ekaamba yawi onnamoova sika anuuhumullulleeye wi apaalleke owiipa mullatu?

⁵ Ethiyo machimwaawo kheyaatille, olakwa wawo khonna malire?

⁶ Waawatihera nivuddo abalaawo wi evelleelle echikole, waawaakha ddoowara ddiwa waahiya epwillimwinddive.

⁷ Khawaavahille maaddi athu ootopa, athu attalla waawiimana yoocha.

⁸ Muthu amasiva annaakha ellapo, awiitukhulla annakeraattheya mwemmo.

⁹ Anaamukhwelle waawiikara mattave, akhwaadduni wahaanyingallella.

¹⁰ Sika misampha ddawaapheella, wohoopopiheya moorurumusa.

¹¹ Epiphi yoomora sika khowora woona, echigumula yohuuhuruwella.

¹² Ethiyo Mulluku khanakhalla muddullu? Wehani etheneeri ddiitthomeyille muddullunnddo, onani orekama wene ddiriiwamvo.

¹³ Koma munallota wi, ‘Mulluku anadduwella tini? Ethiyo ttuuweeruza oweella mu epiphi yoottikana?

¹⁴ Mirapo ddoottikana ddoomuhuruwella wi ahoone, aneeta vamiraponi oddullu.’

¹⁵ Ethiyo oneerovirellella weeta mu ettilla yakhalle eyo yeetamo athu oonanara?

¹⁶ Alliwa yaakhwarulliwa enthawiiwa ehinakwakhwane, matthipellwiiwa yaakusiwa ni maaddi.

¹⁷ Alliwa yaamulleella Mulluku wi, ‘Onivenyerevo. Ethiyo Amasiva Mattheene ttuuneerella tini?’

¹⁸ Komave Mulluku sika addallihalle enyumba ddiwa ni ddaphaama koma malangizo a oonanara aakirekamella.

¹⁹ Oolungama ennoona nave enahakallalla, oohichimwa ennaattheya moonyemulla.

²⁰ Enallota wi, ‘Ddawoona, adanaahu ahoonongiwa, nnddo yaddihiyalliiwa ddohonongiwa ni munllo.’

²¹ We Yobu, attanattho ni Mulluku wi okhalle mwamurendelle. Weera ddiiddo ddineeroweetella phaama.

²² Wiiwellelleke malangizo avayanoni vaye, ohiyeke vamurimani vawo mawaaye.

²³ Ohokollweelle mwawiiyeviha wa Amasiva Mattheene, ddoohilungama ddirekamellane ni enyumbaawo.

²⁴ Golidaawo omweese oohikhalla ni mutteko, eyuumaawo yoowallamella mutengo oyoone wonanko ethaya.

²⁵ Vano Amasiva Mattheene aneerokhalla wonanko golidaawo, aneerokhalla wonanko siliva oowallamella mutengo.

²⁶ Ddawoona, oneerohakallallana Amasiva Mattheene, oneerekowehanattho ni Mulluku mwamurendelle.

²⁷ Oneerovekellattho wa olliye nave aneerowiiwa, oneerovelleella wa olliye ddoollupella ddawo.

²⁸ Eyo onaaganizeewe eneereweereya, owala oneerekomolleella ettilla ddawo.

²⁹ Vawi Mulluku annaakitthiha awiitukhulla, koma annaavullusa awiiyeviha.

³⁰ Annamwaakiha naari muthu oyo ari ni mullatu, oneerovullusiwa ekaamba ya mattaawo yakhalla aweella.”