Yobu 21 - Mawu a Mulluku

Yobu

¹ Vano Yobu ahaakhulla wi,

² “Iwesesani phaama mawaaka, wi nngu okhalle okikhurumusa murima wanyu.

³ Kihiyeni wi killote, kamalliha ollota, muvirellelle okinyaambusa.

⁴ Ethiyo mi kinakhupanyella wa muthu? Ethiyo mi yoohishella murima tti tini?

⁵ Mukiwehe miyaano nave muttikhine nave muphare eyanwaanyu.

⁶ Kaganiza ddennddo, kinnakhwa mullakallaka nave kinnatthukumella wunchichi.

⁷ Kaambiiwa tini oonanara enakhalliiwa ni okumi, enuulluvalliiwa nave enakhalla ni masiva awaata?

⁸ Aniiwa ennakeraattheyana vamiitthoni viwa, edduullu ddiwa ddinnannuwa alliwa yoonaka.

⁹ Enyumba ddiwa kheddiiwaka muttottoroso, ekopo ya Mulluku khenawaatamella.

¹⁰ Anankhorwiiwa ennayariha moohilephela, eziweto ddiwa ddeetthiyana kheddinavudda.

¹¹ Ennaakhumiha aniiwa wonanko mulloko wa eziweto nave ennalluphallupha.

¹² Aniiwa enniipa machipo a ekoma ni magitala, ennahakallalla vawiiwani winlla wa echitolilo.

¹³ Mallapwiiwa ennavira ehakallallaka, enakitthella o ellapo ya ookhwa.

¹⁴ Enamulleella Mulluku wi, ‘Onivenyerevo! Khannapaalla odduwella ettilla ddawo.

¹⁵ Ethiyo Amasiva Mattheene ttaani wi nimurumeyelle? Ethiyo ninaphuravo tini voomuvekellani olliye?’

¹⁶ Ngoonani, ddaphaama ddiwa kheddiri m'mattani mwiwa? Koma malangizo a oonanara aakirekamella.

¹⁷ Tti okavi enyali ya oonanara ethiimaka? Tti okavi otulli waamorellaka? Tti okavi Mulluku aashellaka murima ni waallaka?

¹⁸ Tti okavi aavenyihaka wonanko mallulla oovavihiwa ni ephevo, wonanko makattha ookusiwa ni namangalle?

¹⁹ Munallota wi, ‘Mulluku annaallaka anamwani ekaamba ya machimo a makhollwiiwa.’ Koma muhiyeni Mulluku aahokolloselle oochimwaayo wi edduwelle.

²⁰ Yoone weekhiiwa ollakiwa wiwa, ellawihe owalli wa Amasiva Mattheene.

²¹ Ethiyo okumiiwa wamalla, ennapwathattho dda ohakallalla wa edduullu ddiwa?

²² Ethiyo ookhallavo anaamuhuddihe Mulluku ezeru vawi olliye annaweeruza naari ooddullu?

²³ Amodda enakhwa eri eeyuuma yinchichi, eri vaphaama ni vamurendelleni.

²⁴ Tti ooneneva, amwiilli wawoollowa, ddamuwari mwa makhuviiwa tti ddoonuna.

²⁵ Koma amodda enakhwa murima waavoreyaka, ehinallawihekevo ello yaphaama.

²⁶ Koma attheene ennakhwa ennavitthiwa mu mahame, ennakonaatthi vamodda ni mapwihi.

²⁷ Kinnadduwella maganizwaanyu navettho dda echiwembu munapaalleenyu okeerella.

²⁸ Vawi munnakoha wi, ‘Ethiyo eri wuuwi enyumba ya muttekweene? Ethiyo ori wuuwi musasa olle mwakhalla oochimwa?

²⁹ Ethiyo khemwaakohille athu aweeta m'musewuni? Ethiyo khemunaakhullella nnddo enallotiiwa?

³⁰ Muthu oonanara annahiyiwa va nllapo na otulli, annavullusiwa va nllapo na osha murima.

³¹ Khaavo naari mmodda anamuhumullulla oonanara apaalle omuhokollosella ddoonanara eerilleeye.

³² Aavitthiwaka mu mahame, athu ennawehera va mahame vaye.

³³ Athu attheene ennathwara mutembwaaye, athu ooheerengeya ennahoollella, mwawi naari ethaya ennamwaakhella phaama.

³⁴ Ethiyo munaakikhurumuse murima mwawiidde ni etthiru? Ddawaakhulla ddanyunndda tti ddawoottha.’ ”