Yobu 2 - Mawu a Mulluku

Satana anamweesa wiilli Yobu

¹ Vaakhalla nllapo nimodda mvo angelo a Mulluku yaphiyalliiwa wi eddoonihella vamiitthoni va Apwiya, nayeenettho Satana aaphiya variyari viwa.

² Apwiya yaamukoha Satana wi, “Ethiyo onavenyera wuuwi?” Olliye ahaakhulla wi, “Kinimoona weeteeta waapheella ellapo yavatthi.”

³ Apwiya yaamukohattho Satana wi, “Ethiyo woomoonesesa oorumeyellaaka Yobu? Khaavo mmodda wonanko olliye veellaponi yavatthi. Olliye tti oohichimwa, oolungama, ooheera ddoonanara ni oomoova Mulluku. Olliye tti oororomelleya wunchichi naari weyaano wakiwatiherille wi kiwaakhullelle wi omuhoosa vihiri ekaamba.”

⁴ Satana awaakhulla Apwiya wi, “Mwiilli olliva mwiilli. Muthu ttuuddivelleella ddittheddene ariiyena wi akhalle ni okumi.

⁵ Koma vano onongani makhuvaaye ni mwiillaaye nave moohikayika aneerewuullotellani epewe.”

⁶ Apwiya yaamwaakhulla Satana wi, “Eyaa, vano ddittheddene Yobu ariiyena kooddihiya m'mattani mwawo koma ohimwaakhe okumaaye.”

⁷ Sika Satana aavenyavo vamiitthoni va Apwiya. Vano aaya woomuhoosa Yobu ni etthuku ddoovoreya ovenyera omanyalloni ophiyera omuruni waye.

⁸ Sika Yobu aakusa nivalli aniiwakana akeraatthille vaddallani.

⁹ Vano mwaariye aamulleella wi, “Ethiyo onnaroromellave wa Mulluku? Mullotelle epewe nave okhwe!”

¹⁰ Koma Yobu aamwaakhulla wi, “Onallota wonanko mutthiyana ookarangeya. Ethiyo ttuwaakhella ddaphaama ovenyera wa Mulluku nave ttuukhoota waakhella ddoonanara? Va ddittheddenenndda Yobu khaachimwalle ni eyanwaaye.”

Owa wa akhwaaye a Yobu

¹¹ Vano akhwaaye araru a Yobu, Elifazi Mutemani, Bilidadi Mushuki ni Zofari Munaama, yiiwalliiwa dda ddoohoosannddo ddammorenlle, yaawa mwawiiwanana wi emupepese ni omukhurumusa murima.

¹² Voomoonellani voorekama Yobu kheyaamudduwenlle, sika yahoopa ekutho. Yahaahulla mikanjo ddiwa, yiihella nthupi omuruni.

¹³ Yaakeraatthi vatthi ni Yobu wa mallapo matthanu ni meelli, otthaana ni mahiiyu. Nave khaavo naari mmodda allotille ello ni Yobu ekaamba yahoona wi Yobu aari mu ddoohoosa ddawoopiha.