Yobu 19 - Mawu a Mulluku

Yobu

¹ Vano Yobu ahaakhulla wi,

² “Ethiyo munaakihoose ophiyera niini? Kaambiiwa tini munakihomeenyu ni mawu?

³ Munnakinyaambusa wiilliwiilli. Ethiyo khamunawulliwa muru mwaakihoosaka?

⁴ Naari ddiri ddawoona wi koochimwa, ochimwanko tti waaka.

⁵ Ddawoona, munniitukhulla vamiitthoni vaka, ddoohoosa ddakanndda muneesa omboni wa ochimwa waka.

⁶ Ethiyo khamunadduwella wi Mulluku sika akirukunuwelle, olliye sika akireyille musampha yoolla.

⁷ Kininlla mookhuwa wi, ‘Ekhoto!’ Koma khaavo anakaakhulla, kinniitthana mookhuwa koma echilungamo khenooneya.

⁸ Mulluku ookitiyella ettilla wi kihivire, musewaaka oowuhuruwella ni epiphi.

⁹ Ookaakha miyaano eyuumaaka, ookirulla enduwiraaka yoolemu.

¹⁰ Ookinyenya embali ddittheddene, koomalla, ootulla etiyerellwaaka wonanko muteekho.

¹¹ Mulluku ookishella murima, anakeesa mudanaaye.

¹² Akhotwaaye aakaapheella nave aakuupa, aakitthipellella misasa waapheella enyumbaaka.

¹³ Mulluku ookimwallaniha ni abalaaka, ohaatthattusa oodduwellana wonanko alleto.

¹⁴ Abalaaka aakithawa, akhwaaka aakitathilla.

¹⁵ Athu awaarera mpa mwaka aakitiwalla, allupa muttekwaaka enakeesa mulleto, kootthattuwa mullupa oovira m'mwiitthoni mwiwa.

¹⁶ Kamwiithana mullupa muttekwaaka khanaakhulla, naari kimuveke ni eyanwaaka.

¹⁷ Kinnunkha muwano vamiitthoni va mwaaraka, kiri ello yoonanara wa abalaaka a erukullu emodda.

¹⁸ Naari anamwani ang'onong'ono ennakivevulla, kaaweetaka ennakillota.

¹⁹ Akhwaaka a vamurimani attheene ennakiita, ayo kaakondilleemi aakirukunuwella.

²⁰ Koomalla, kihanlle makhuvave, kaayaamo, kivulluwalle vaweella vene.

²¹ Akhwaakanyu, keerelleni echifundo pepaani keerelleni echifundo, vawi nnatta na Mulluku nookillaka.

²² Ethiyo munakithwarella tini wonanko Mulluku? Ethiyo okihoosanngu khonuukwakhwaneni?

²³ Mawaaka yuupuwelliweke, ddaaweerokhalla phaama, yalembiweke mu nibukhu, ddaaweroreera.

²⁴ Apaalle yawakiweke vanllukuni ni mukoko, yagobiweke wi ekhalle wa enthawi yoohimalla, ddaaweeroddiva.

²⁵ Kinnadduwella wi ookoopollaaka tti mukumi, voomallihella aneeroowa wi akoopolle.

²⁶ Nttapara naka namalla woonongeya, komave mu okumi yoolla kineeromoona Mulluku.

²⁷ Miyaano sika kinaamoone, khe muthu mmoddattho, kineeromoona ni miitthwaaka, murimaaka ori va nllaponno.

²⁸ Koma nyuwaano munallota wi, ‘Ethiyo ninaamuhoose mwawiidde vawi anahoowa ekaamba ya ddavamuru vaye?’

²⁹ Nyuwaano moove nsupada, vawi ollaka onawa ni nsupada, wi mudduwelle wi wookhalla echiweruzo.”