Yobu 18 - Mawu a Mulluku

Bilidadi

¹ Vano Bilidadi mu Suki ahaakhulla wi,

² “Ethiyo we Yobu onaashaashe yoollota ophiyera niini? Era ellapo tuu, apella maaru, hiyaano nineerollota.

³ Ethiyo nineeselliwa tini eng'ombe, nikarangeyelle tini vamiitthoni vawo?

⁴ Oniiphoriihe phudda ni onanariwa wawo. Ethiyo ellapo ttuutathilliwa ekaamba ya weyaano, apaalle nlluku ttuuvenyihiwavo ekaamba ya weyaano?

⁵ Enyali ya oochimwa yoothiima, mallumi a munllwaaye khenawala.

⁶ Owala wa mpa mwaye woothiima, enyalaaye vakhwipimva khenakhara.

⁷ Khalle aaneeta ni masiva, koma vano ookukhumuwa, ezeru ddaye ddoomurukunuwella.

⁸ Manyallwaaye ennammorihella munthavini, vaweetani annamorella munllitini.

⁹ Musampha woomukola etotopwa, nikhatto noommaka.

¹⁰ Nikhatto ninareyiwa vatthi mwawiipittha, musampha wooreyiwa muttilla.

¹¹ Ddawoopiha ddinnamutthukumelliha erive embali, ddinnamuthwara manyallo.

¹² Masivaaye aagonjihiwa ni ettalla, otulli onnatiyerella okwakwatuwa waye.

¹³ Ereta yoomullandda mwiilli muttheene, yoollalliha meto ni mattaaye mattheene.

¹⁴ Ootulliwa mpa mmo aroromelleeye, aamukusella vamiitthoni va mwene awoopiha.

¹⁵ Mpa mwaye munakhalla nnddo ddihiri ddaaye, vookhalla vaye vineeromiddiwa sulufure.

¹⁶ Vatthi, misisi ddaye ddinnumma, vaddullu, enthambi ddaye ddinnanyaalla.

¹⁷ Khawa uupuwelliwattho veellaponi yavatthi, nnddina naye nineerotiwalliwa.

¹⁸ Eneeromukakha omuvenyiha mu owala eneeromwiikariha mwiillaponi yookhallamo athu.

¹⁹ Khawa akhallana anamwani apaalle edduullu, khavikhallattho oohalla vanipuroni naye.

²⁰ A woovollowa nndduwa eneerottikhina nllapo nenna, a wookhumella nndduwa eneerewaapheella muru.

²¹ Ddawoona, olla sika otulli onaamorella athu oonanara, nngu sika omalla wa athu oohimudduwella Mulluku.”