Yobu 17 - Mawu a Mulluku

¹ Murimaaka woophweeya, mallapwaaka aamalla, mahame aakaatthamella.

² Ddawoona, virive veko athu enimakittheya, kinnoona ni miitthwaaka mmo enakinyaambuselliiwa.

³ Nyookha Mulluku mukhalle echikolaaka vawi khaavo mmodda ookitetezella.

⁴ Moowalla mirima ddiwa wi ehidduwelleseseke, sika muhaakhullelle wi epambane.

⁵ Oowaavelleella akhwaaye ekaamba ya eyuuma, anaaye eneerohoosiwa.

⁶ Ookitthattusa yoottheyiwa ni athu, ookoona ennakittapha.

⁷ Miitthwaaka aaripa ni ethakaraka, kihanlle makhuvave.

⁸ Athu ooreera murima ennattikhinana ddenndda, oohichimwa ennaashella murima oohimoova Mulluku.

⁹ Komave oolungama ennumellella ettilliiwa, oohilakwa ennallipihella okhalla aweella.

¹⁰ Koma muwe attheene, mullotettho mawaanyu, variyari vanyu ngimphwanyavo eezeru naari mmodda.

¹¹ Mallapwaaka aamalla, ddoopaalla ddaka ddookukureya, ddootiyerella ddaka ddoovira.

¹² Akhwaaka enatthattusa mahiiyu wonanko otthaana, eni, “Owala wohaatamella” koma vaavo epiphi ettikanne.

¹³ Etiyerellwaaka tti ellapo ya ookhwa, nko kinaakoneemi mwiipiphini?

¹⁴ Kallota wa nlliti wi, “Ori attiitthaaka,” ni wa miingu wi, “Ori amoowaaka, ori murokoraka,”

¹⁵ ethiyo etiyerellwaaka eri wuuwi? Ethiyo ttaani anaayoone?

¹⁶ Ddawoona, ngithaananana o ellapo ya ookhwa, ngikitthellana nimodda onthupini.