Yobu 16 - Mawu a Mulluku

Yobu

¹ Vano Yobu ahaakhulla wi,

² “Kaaddiiwa khalle ddenndda, attheenenyu khamudduwelle okhurumusa murima.

³ Ethiyo munaahiye niini ollota shisha, yuuvoreyilleni tti tini wi mwaakhulle?

⁴ Keerollota wonanko muneerelleenyu, mwaariki wonanko kikhallelleemimmu. Keerodduvudda mweezeru murwaaka, keerotthukumaniha mawu awuuhumullullani.

⁵ Keerewuullipihani ni mawaaka, keerewuukhurumusani ni ddoollota ddaka.

⁶ Kallota, ovoreya waka khonavukuwa, keera ellapo tuu, khonakihiyattho.

⁷ Ddawoona, Mulluku ookitthattusa, nibanja naka nittheene oonitthollosa.

⁸ Ookiphara, ootthattuwa omboni wawi miyaano tti oolakwa. Nave kihanlle makhuvave, osimikizella wi mi tti oolakwa.

⁹ Mulluku ookitthalla moonanariwa, ookiita, ookillumella miino, mudanaaka ookikhumihella miittho.

¹⁰ Athu ennakivevulla ni eyano ddiwa, enakuukutha vanramani mweepewe, ennatthukumana ollipana ni miyaano.

¹¹ Mulluku ookivelleella wa oohimullapella, ookivokhella m'mattani mwa oonanara.

¹² Kaari vamurendelleni, koma ookinyenya. Ookiphara nikohi, ookinyokotholla, ookiimesa ookitthattusa vaweeseravo.

¹³ Mipaamba ddaye ddookaapheella, ookihoma apellepetwaaka moohimoriwa ethakaraka, oomutathillella vatthi wamwaaka.

¹⁴ Anakhallella okiphoriiha wiilliwiilli, anallipana ni miyaano wonanko akhoto.

¹⁵ Kohiisowella echiguduli vamwiillini vaka, kihiyalle masivaaka munthupini.

¹⁶ Miitthwaaka aafiira ni winlla, ahiipa wunchichi.

¹⁷ Koma ngineereke ddeekuku, ovekella waka tti woolungama.

¹⁸ We ellapo, ohikhuneelle nikhame naka, winlla waka ohoone vawiithuuwella.

¹⁹ Ngoonani, mbonaaka ari oddullu, namunkhoswaaka ari wenko.

²⁰ Akhwaaka emmakinyindulla, miitthwaaka enarupa miitthori omwinllella Mulluku.

²¹ Mmodda akipepeselle wa Mulluku, wonanko aneerella muthu ni mukhwaaye.

²² Vawi ddavira miyakha ddooyeva, kineereweeta ettilla yoohihokollowa.”