Yobu 15 - Mawu a Mulluku

Okambirana waneepiilli

Elifazi

¹ Vano Elifazi Mutemani aallota wi,

² “Ethiyo muthu eezeru ttiwaakhulla ddoohiphara murima ddiidda apaalle ttuuddalla ni mawu shisha wonanko ephevo?

³ Ethiyo ttuuvaanyiha mawu oohiphura ello apaalle ddoollota ddoohikhalla ni mwiinyu?

⁴ Koma onapaalla athu ehimooveke Mulluku, ehiye ovekella wa olliye.

⁵ Machimwaawo ennalamulella eyanwaawo, onaddiipitthiha vawiishani nllumi.

⁶ Nguuvaanyihalle koma mawaawo, enawiipa mullatu tti eyanwaawo.

⁷ Ethiyo weyaano tti muthu awaamba? Ethiyo waakhallavo miyaango ddihinaphatusiwe?

⁸ Ethiyo waarina nimodda alangizi a Mulluku? Ethiyo oneesa eezeru tti weekhave?

⁹ Onadduwella tini eyo nihidduwelleehu? Oniiwesesa tini eyo nihiniiweseseehu?

¹⁰ Variyari vahu vookhalla eembwi ni awuulluvalla, akhallekhalle waakhwaranya attiittho.

¹¹ Ethiyo okhurumusa murima wa Mulluku wohuuyevella apaalle mawu awuuphiyera moomaalleyaalla?

¹² Ethiyo onashella murima tini, onanikhumihella miittho kaambiiwa tini?

¹³ Ethiyo onamuwukilella tini Mulluku, onamuvevullella tini ni eyanwaawo?

¹⁴ Ethiyo muthu tti tini wi ttuukhalla oohichimwa, ooyariwa ni mutthiyana ttaani wi ttuukhalla oolungama?

¹⁵ Vawi Mulluku khanaaroromella naari oorumeyellaaye, naari oddullu khoneella vamiitthoni vaye.

¹⁶ Vawiidde muthu oonanara ni oochimwa, oowirya ddoonanara wonanko maaddi.

¹⁷ Kaapelle maaru kuulleelle, kuutthopoollelle koonilleemi.

¹⁸ Yakihuddihalle yawoona tti eezeru, kheyaakivitthelle yiiwalliiwa wa makhollwiiwa.

¹⁹ Tti ayo yaakhenlle ellapwiiwa, yahaakhullenlle ohollosiwa ni mulleto.

²⁰ Oonanara anaakhalleke mu ddoovoreya mallapo mattheene, eekuku aneerekohoosiwa miyakha ddittheddene.

²¹ Anniiwa mawu awoopiha owaruni waye, vaweesani wi ari vamurendelleni, anamasikita eneeromuhella ekhoto.

²² Khanakhulupililattho wi ttuuvulluwa o epiphi, koma anatiyerella nsupada.

²³ Annaashaasha yoocha anakoha wi, ‘Eri wuuwi?’ Annadduwella wi nllapo neepiphi nohaatamella.

²⁴ Ddoohoosa ni ddookatamiha ddinnamoopiha, ddinamugonjiha wonanko mwene ookhozekella ekhoto.

²⁵ Ddommorella kaambiiwa aamuwukila Mulluku, aamunnuwella murima Amasiva Mattheene.

²⁶ Aakusa echishangwaaye mwawumma murima, aathamaka wi allipane ni Mulluku.

²⁷ Naari ekhovaaye tti yawiitivalla, naari muyuununi mwaye tti moonenevesa,

²⁸ anaakhalleke mu mizinda ddookumuwa, mu enyumba ddoohikhalliwa, enyumba ddootthattuwa matepe.

²⁹ Khatukhuwa, eyuumaaye khellekella, ezipaso ddaye kheddaata veellaponi.

³⁰ Olliye khawora oyithawa epiphi, anaakhalle wonanko enthambi ddoosha ni munllo, muteekho oyo malluwiiwa enavakaresiwa ni ephevo.

³¹ Ahiilleke voororomellani ddoohikhalla ni mutteko, vawi ddennddo sika ddinaakhalle mallivellwaaye.

³² Anaanyaalle ohinaseve, enthambaaye khephuwattho.

³³ Anaanyaalle wonanko mpesa onavakareya ezipaso ddihiniithwe, wonanko muteekho wa olivi ovakaresille malluwa.

³⁴ Milloko dda oohikhulupilila kheddiphura ello munllo oneeroshellelliha enyumba dda awaakhella ddamukaphwani.

³⁵ Alla sika ooddalla ekuku ni aweera ddoonanara, enthawi ddittheddene enaganiza ddoolleka.”