Yobu 13 - Mawu a Mulluku

¹ Ngoonani, miitthwaaka ahoona ddenndda, kohiiwa ni maarwaaka, koodduwella.

² Kinnadduwella nnddo munadduwellaanyu, ngihiyo mwaana wa nyuwaano.

³ Koma kinaallote ni Amasiva Mattheene, kinapaalla killote mullatwaaka ni Mulluku.

⁴ Nyuwaano tti ooddiva vayanoni, attheenenyu tti allupa murete awoottha.

⁵ Mweerilleke ellapo tuu, mweereweesiwa eezeru.

⁶ Vano iwani ddoollota ddaka, mwiiwellelle okhupanya wa vayanoni vaka.

⁷ Ethiyo munootthella tini munipuroni mwa Mulluku? Ethiyo munallotella moolleka tini munnddina naye?

⁸ Ethiyo nyuwaano ttuumukondella? Ethiyo ttuumuteteza vamullatuni?

⁹ Munaakomelle vaavi Mulluku uuwehesesani? Apaalle ttuumulleka wonanko muneerelleenyu ni muthu?

¹⁰ Ddawoona, anerewuuhumullullani, mwaakondellaka mwawiipittha.

¹¹ Ethiyo olamulellwaaye khowoopihani? Ethiyo masivaaye kheyuutthukumellihani?

¹² Miyambi ddanyunndda ddiri shisha wonanko ntuura, muniiteteza ni mawu oohillipa wonanko olloko.

¹³ Mweere ellapo tuu, kihiyeni killote, eneereye ekeereyelle.

¹⁴ Kookhozeka otathilla okumaaka, wakhalla okhwa kikhwe.

¹⁵ Naari akiiphe, kineromuroromellave, kinerotthopoolla mullatwaaka vamiitthoni vaye,

¹⁶ ella sika enaakivulluse, vawi muthu oohimoova Mulluku khiimella vamiitthoni vaye.

¹⁷ Mwiiwesese phaama mawaaka, mwaapelle maaru ddoollota ddaka.

¹⁸ Koowukhozekella phaama mullatwaaka, koodduwella wi kiri oohilakwa.

¹⁹ Ethiyo ookhallavo anaakihumullulle? Aarimi arivo, kineereweera ellapo tuu ni okhwa.

²⁰ Nyu Mulluku, mukivahe ddeko piillive, vano ngaaheya owiipitthellani.

²¹ Muhiye okillaka, muhikinyenye ni woopiha wanyu.

²² Kiithaneni nave kineerewaakhulla, apaalle kiwiithaneni nave mukaakhulle.

²³ Ethiyo ddoolakwa ddaka ni machimwaaka tti ddikavi? Mukilleelle ddoolakwa ddaka ni machimwaaka.

²⁴ Ethiyo kaambiiwa tini munakiipitthihelleenyu? Ethiyo munakeesella tini mudanaanyu?

²⁵ Munoopopihella tini nikukhu noovava ni ephevo? Muniikarihella tini mallulla oottheereya?

²⁶ Nyuwaano munnakiipa millatu ddoowaawa, munnavuhulla ddoolakwa dda esombwaaka.

²⁷ Munnamaka meto ddaka ni namang'ona, munnawehesesa meetellwaaka mattheene, munnakithwara manyallo orive weko.

²⁸ Muthu anamalla wonanko ello yawunta, wonanko yoowara yoottakhuniwa ni enjenjete.