Yobu 12 - Mawu a Mulluku

Yobu

¹ Vano Yobu ahaakhulla wi,

² “Ddawoona, nyuwaano sika athuathu, ezeru ddanyu muneeremarowana.

³ Koma kookhalla ni ezeru wonanko nyuwaano, ngihiyo mwaana wa nyuwaano. Ethiyo ahinadduwella ttaani ddenndda?

⁴ Kinnattheyiwa ni akhwaaka, miyaano oyo kaveka wa Mulluku, aanakaakhulla, muthu oolungama ni oohichimwa, koma ollello kiri oottheyiwa.

⁵ Muthu oohitikheya annavevulla otulli. Otulli onammorella ooserenguwa.

⁶ Enyumba dda anamasikita ddinakhalla mwamurendelle, oomuttatthamulla Mulluku sika ddinateteziwa, ayo enaroromella masiviiwa wonanko tti Mullukwiiwa.

⁷ Koma koha enama ddamuhakani, ddineerewuhuddiha apaalle epallame, ddineerewuulleella.

⁸ Apaalle llota ni ellapo yavatthi, enerewuuhuddiha, apaallettho ehomba ddamunyanja, ddineerewuutthopoollella.

⁹ Ethiyo mwa ddittheddenenndda ttiivi ehinadduwella wi nnatta na Apwiya sika neerille ddenndda?

¹⁰ Ddookumi ddittheddene ddiri m'mattani mwaye, emoddamoddavettho mpweya wa athu attheene.

¹¹ Ethiyo khe naaru nineesa mawu wonanko mmo nllumi ninallawihelliiwa yoocha?

¹² Ezeru ddiri ni athu awuulluvalla, odduwellesesa ori ni attekweene.

¹³ Koma Mulluku ookhalla ni ezeru ni masiva, ookhallattho ni odduwellesesa ni mwambo.

¹⁴ Akumulla, khaavo oomakattho. Amuwallella muthu mundende, khaavo oomuhullella.

¹⁵ Ammaka murimu, ellapo ennuuma, amuttaphulla, maaddi ennasefukella.

¹⁶ Ookhalla ni masiva ni ezeru, oollekiwa ni oolleka, attheene eri m'mattani mwaye.

¹⁷ Annaddaakha ezeru enduna, annaakarangeyiha aweeruza.

¹⁸ Annaakitthiha mamwene vampandoni viwa, annaatthattusa a mundende.

¹⁹ Annaakha ezeru dda allupa mukutho, annaakitthiha oohoollella amasiva.

²⁰ Annaweeriha ellapo tuu oororomelliwa, annawaakha attekweene odduwella.

²¹ Annaavevulla athu oovuwa, annawinttaka muuphello amasiva.

²² Annuupullulla ddawiipittheya mwiipiphini, annatthattusa epiphi owala.

²³ Annunnuwiha mitundu dda athu, annawaatiha malloko nave annaapallallesattho.

²⁴ Annawaakha odduwella oohoollella a ellapo yavatthi, annaweetiha swaswaswa muhakani.

²⁵ Annawaapapelliha mwiipiphini, moohiwala, annaahahareyiha wonanko oolezela.”