Yobu 11 - Mawu a Mulluku

Zofari

¹ Vano Zofari Munaama aallota wi,

² “Ethiyo mawu mattheenaalla tti oohaakhulliwa? Ethiyo otokollolla ttuulungamiha?

³ Ethiyo otokollolla ttuuwaamaka athu vayanoni? Ethiyo waavevullaka ahikhallevo awuuhumullulla?

⁴ We oneesa wi mawaawo tti awoona, onaddeesa oohichimwa vamiitthoni va Mulluku?

⁵ Koma ha, waphaama Mulluku allotilleke, ahullalleke eyanwaaye mowuuhumullulla.

⁶ Aaweerewuutthopoollella ddoovittheya ddeezeru vawi ezeru ddaye tti ddoowallamellesesa. Dduwella wi Mulluku animuullaka vang'ono, moohillikana ni ddoolakwa ddawo.

⁷ Ethiyo weyaano ttuuwiiwesesa ddoovittheya dda Mulluku? Ethiyo ttuudduwella vookomella ezeru dda Amasiva Mattheene?

⁸ Tti ddoorekama okhwaranya oddullu. Ethiyo weyaano ttuuweeravo ello? Tti ddoowallamella okhwaranya ellapo ya ookhwa? Ethiyo weyaano ttuudduwellavo ello?

⁹ Muyesweene tti woorekama okhwaranya ellapo yavatthi, tti wooramballalla okhwaranya enyanja.

¹⁰ Ethiyo Mulluku avira nave uuwallella mundendeni, uukokella omillatuni, ttaani anaamuvaanye?

¹¹ Mulluku annaadduwella athu awoottha! Ethiyo khapwatha oona ddoonanara?

¹² Valle mukarangeya khawa atthattuwa eezeru, vaavove enama ddamuhakani dditthattuwalle eziweto.

¹³ We Yobu, potokosa phaama murimaawo, tukhullella nnatta nawo wa Mulluku.

¹⁴ Ovenyihemo ddoolakwa m'murimani mwawo, erive yoonanara ehikhalle mpa mwawo.

¹⁵ Weera ddiiddo khowulliwattho muru, khowaramellaka vatthi vamiitthoni va athu. Murimaawo oneerokeraattheya, khewoovaka erive ello.

¹⁶ Oneerotiwalla ddoohoosa ddawo wonanko maaddi oovira.

¹⁷ Okumaawo oneerowala okhwaranya nndduwa, epiphi eneerotthattuwa otthaana.

¹⁸ Oneerollipa murima vawi vookhalla etiyerello, oneerokhalla mwamurendelle vawi oneerewakihiwa.

¹⁹ Onaakoneke moohirurumuseya, anchichi eneerekewuuveka.

²⁰ Koma oonanara oneeromwaramwara miittho mohalleella, kheyoona woothawella, etiyerellwiiwa tti okhwa.”