Yobu 10 - Mawu a Mulluku

¹ Ddawoona, kinnavevulla okumaaka, sika kineerollota moottaphuwa ddookhupanya ddaka, kineerollota moovoreyiwa murima.

² Nyu Mulluku, muhikeeruze oolakwami, mukilleelle eyo munallipanelleenyu ni mi.

³ Ethiyo enuuddivellani tini mwaakihoosaka, ovevulla mutteko wa mattaanyu, munakondella ddoolinga dda oonanara?

⁴ Ethiyo miitthwaanyu tti oomuthu apaalle munoona wonanko anoonella muthu?

⁵ Ethiyo mallapwaanyu tti wonanko a muthu apaalle miyakha ddanyu ddiri wonanko dda muthu?

⁶ Kaambiiwa tini munakaashereenyu ddoolakwa apaalle munakiipella tini mullatu?

⁷ Naari mudduwellaka wi ngilakwille khaavo anaakivulluse m'mattani mwanyu.

⁸ Mattaanyu yaakoopa, ekiphatusa koma vano mookirukunuwella wi mukoononge.

⁹ Upuwellani wi mwakoopille ni olloko. Ethiyo vano munakihokollosella onthupini wenko?

¹⁰ Ethiyo khemwaakimiminne wonanko mukaka, mukillipihe wonanko mukaka woottikana?

¹¹ Mwaakihuruwella ni muhehe owaaka nttapara, mwaallutellellattho makhuvaaka ni misempha.

¹² Mwaakivaha okumi ni echikondi yoohisintheya, munepaaka woosungeya ni opwatha wanyu.

¹³ Koma nndda mwaaddivittha m'murimani mwanyu, koodduwella wi ella yaari yoolingaanyu.

¹⁴ Munnakiwehesesa kaachimwaka, khamunapaalla okikhululukella machimwaaka.

¹⁵ Kachimwa, otulli ori ni miyaano! Kakhalla oolungama, ngiitukhulla vawi kinnawulliwa muru vawoonani ddookatamiha ddakanndda.

¹⁶ Naari vawiillipihani meekha, munnakisaya wonanko mukango, munnakoopopiha ni masivaanyu.

¹⁷ Munnawoonjerera amboni ookihumullulla, owallaanyu onnavirellella waata, akhotwaanyu oollipana ni miyaano ennaruuwa.

¹⁸ Nyu Mulluku, ethiyo mwakiphatuselle tini? Waphaama kakhwilleke naari muthu mmodda ahinakoone.

¹⁹ Keerokhalla wonanko nginakhallekewo, kakhumalleke mwiirukulluni kivollowa mu mahame.

²⁰ Ethiyo mallapo a okumaaka khehanlle vang'ono? Kihiyeni wi kiithuuwe vang'ono.

²¹ Kinaya woohihokollowiwa, ellapo yeepiphi yoottikana,

²² ellapo yeepiphi yoottikanesesa ni yanampallalla nko owala tti wonanko epiphi.