Yobu 1 - Mawu a Mulluku

Satana anamweesa Yobu

¹ Vaakhalla muthu mmodda mu ellapo ya Uzi nnddina naye Yobu. Muthoolla aari oohichimwa, oolungama, ooheera ddoonanara ni oomoova Mulluku.

² Ahaayara anamwani aallopwana atthanu ni eelli ni anamwani aatthiyana araru.

³ Aakhalla ni enkhosa 7,000, ekamira* 3,000, eng'ombe ddamutteko 1,000, abulu aatthiyana 500 ni allupa mutteko anchichi. Sika aari muthu oolemelesesa waakhwaranya athu attheene a o ellapo dda wookhuma nndduwa.

⁴ Anaaye aallopwana yaanakeraatthiha machellello mwawaakakhana, nllapo nimodda wa mmodda, nllapo nimodda wa mmodda. Nave yaanawiithana arokoriwa ararwaalle o machellelloninko wi eche ni owirya vamodda.

⁵ Vano mallapo a machellello yamalla, Yobu aanavenya ohinase ovelleella mikutho ddooshellelliha nave aanaddivelleella moollikana ni waata wa anamwanaayo wi yeellihiwe. Eera ddenndda vooganizani wi apaalle mmodda mwa anaaye aachimwa nave oomullotella epewe Mulluku m'murimani mwaye. Yobu aaneera ddenndda enthawi ddittheddene.

⁶ Nllapo nimodda anamwani aallopwana a Mulluku yaphiyalliiwa wi eddoonihelle vamiitthoni va Apwiya, nayeenettho Satana aaphiya variyari viwa.

⁷ Apwiya yaamukoha Satana wi, “Ethiyo onavenyera wuuwi?” Olliye ahaakhulla wi, “Kinimoona waapheella ellapo yavatthi.”

⁸ Apwiya yaamukohattho Satana wi, “Ethiyo woomoonesesa oorumeyellaaka Yobu? Khaavo mmodda wonanko olliyooyo veellaponi yavatthi. Olliye tti oohichimwa, oolungama, ooheera ddoonanara ni oomoova Mulluku.”

⁹ Satana aawaakhulla Apwiya wi, “Ethiyo Yobu anamoova Mulluku nivuddove?

¹⁰ Ethiyo nyuwaano khemukhanlle mumutetezaka virive veko, olliyoolle vamodda ni nibanja naye ni ddeko ddaye ddittheddene? Moomudalisa va mitteko ddaye ddittheddene nave eyuumaaye yohaata wunchichi.

¹¹ Koma mwahiya omuteteza nave mwamwaakha ddittheddene ariiyena, moohikayikella aneerewuullotellani epewe vamiitthoni vanyu.”

¹² Apwiya yaamwaakhulla Satana wi, “Eyaa, vano ddittheddene Yobu ariiyena kooddihiya m'mattani mwawo koma ohimuttannye olliye.” Sika Satana aavenyavo vamiitthoni va Apwiya.

Woonongiwa wa anamwani ni eyuuma ya Yobu

¹³ Nllapo nimodda anamwani aallopwana ni aatthiyana a Yobu yaarina ocha ni omuwirya vinyo mpa mwa muullupalliiwa.

¹⁴ Vano amithenga aaphiya wa Yobu ni mawu awi, “Eng'ombe ddillimaka nave abulu echaka vakhwipimva

¹⁵ moohitiyerella ello Aseba yaakhumellella nave yaakha eng'ombe ni abulweene. Nave yoowiipha allupa mutteko attheene. Nave meekhave sika kivulluwalle wi kuulleelleni.”

¹⁶ Ahinamallihe ollota, amithenga mmodda aaphiya ni mawu awi, “Munllo wa Mulluku waamora ovenyera oddullu nave wooshellelliha enkhosa ddittheddene ni abuseene. Nave meekhave sika kivulluwalle wi kuulleelleni.”

¹⁷ Ahinamallihe ollota, amithenga mmodda aaphiyattho ni mawu awi, “Milloko miraru dda Akaldeya ddaaphiya nave ddinaakha ekamira ddittheddene ni owiipha allupa mutteko attheene. Nave meekhave sika kivulluwalle wi kuulleelleni.”

¹⁸ Ahinamallihe ollota, amithenga mmodda aaphiyattho ni mawu awi, “Aniinyu aallopwana ni aatthiyana attheene yaarina ocha ni omuwirya vinyo mpa mwa muullupalliiwa.

¹⁹ Moorurumusa ephevo yawoopiha yaawa ovenyera o echipululu yoopella embali ddittheddene ddisese dda enyumba mwawi yookumuwa nave yohaaphitteera anamwanaayo. Attheene ahiiphiwa nave meekhave sika kivulluwalle wi kuulleelleni.”

²⁰ Vano Yobu aavenya, aahulla mukanjwaaye nave aachema murwaaye. Nave aakokhora ni waallapella Apwiya

²¹ allota wi, “Epwillimwinddive kaakhuma m'mirimani mwa amoowe nave epwillimwinddive kineerovollowa mu mahame. Apwiya yaavaha nave Apwiya ahaakha. Nititimihiwe nnddina na Apwiya.”

²² Va ddittheddenenndda Yobu khaachimwalle apaalle omwiipa mullatu Mulluku.