Yesaya 9 - Mawu a Mulluku

Mwene a muhoollo

¹ Koma athu ayo eri mookhupanya khewattho etathilla murima. Mallapo akhalle Mulluku aavevulla ellapo ya Zebuloni ni ya Nafutali koma muhoollommu eneeroyitthattusa yoolemu echigawo ettheene ovenyera o Enyanja Yuullupalli ya wookhuma nndduwa ophiya o ekhopella ya muhinje wa Yordani, sika wi ellapo ya Galileya, ellapo ya athu a mitundu ddimodda.

² Athu ayo yeeta mwiipiphini ahoona owala wunchichi. Ayo yakhalla mu epiphi yawoopiha owala wohaaphiyera.

³ Nyu Apwiya, mohaatiha mutundwaanyu, mohoonjerera ohakallalla wa athwaanyu. Alliwa ennahakallalla vamiitthoni vanyu wonanko mmo athu enahakallallelliiwa voohatani, mmo enahakallallelliiwa vookawanani ddawaakha.

⁴ Vawi mohunttaka nigoli* niwa noollemella, ekopo yuukuthelliiwa mathuriiwa, miwashullo dda athu owaahoosa wonanko mweerelleenyu vawaagonjihani Amidiyani.

⁵ Ddawoona, erive esapato ya muthu akhoto ni erive yoowara yoomorelliwa nikhame, ddineerokharihiwa wonanko ekhuni.

⁶ Vawi mwaana ooniyariwella! Noovahiwa mwaana aamullopwana! Olamulello onaakhalle m'mattani mwaye, aneerovahiwa nnddina nawi Oolangiza Oottikhiniha, Mulluku Amasiva, Attiitthi Eenthawi Yoohimalla, Mwene amurendelle.

⁷ Olamulello ni murendellaaye ddineerovirellella waata, aneerokhalla va mpando wa mwene Davide, aneerokeraatthiha ni ollipiha omwenaaye, vaweerani ddoolungama ni ddaphaama waambeella enthawi yeeyo wa enthawi yoohimalla. Ni murimiiwa muttheene Apwiya Amasiva Mattheene yoosimikiza okwakhwanihella ddenndda.

Apwiya eneeromullaka Israele

⁸ Apwiya aarumiha mawu oomuhumullulla Yakobo nave emorenlle va Israele.

⁹ Athu attheene ookhalla mu Efuremu ni mu Samariya eneerewiiwa ddoothwarellella dda mawu yaalla. Vawi alliwa ennallota mookota ni mwawiitukhulla wi,

¹⁰ “Naari enjerwa ddinyenyeyille, hiyaano ninaamake ni malluku oosema. Naari epattho ddanamukuyu ddikumulliwe, hiyaano ninaamake epattho yamikunguza munipuroni mwene.”

¹¹ Sika Apwiya yohaavenyihella adaniiwa nave yahaattushella wi ewanena.

¹² Asiriya wookhuma nndduwa ni Afilisti woovollowa nndduwa yohaatthama wi yaamirye Aisraele. Komave osha murima wa Apwiya khonaamallelle ekaamba ya ddenndda nave muwonwiiwa tti woottaphurusattaphurusa wi yaallake.

¹³ Athu kheyaahokollweelle wa Mulluku oyo anawiipha, kheyaawaashaashille Apwiya Amasiva Mattheene.

¹⁴ Sika Apwiya aaphadda muru ni mwiilla wa Israele, enthambi ya kanjeza ni mululu va nllapo nimodda.

¹⁵ Attekweene ni oovuwa sika muru nave anamallotella oohuddiha ddawoottha sika mwiilla.

¹⁶ Vawi ayo enaahoollella athwaalla sika enaahollosa nave oohoollelliwaayo ennarimeella.

¹⁷ Ekaamba ya yeella Apwiya khewa ehakallalla ni asombwe nave kheyaamoriwella ethakaraka akhwaadduni ni anamukhwelle, vawi arive muthu khanapwatha dda Mulluku, tti oochimwa nave anallota ddoonanara. Komave osha murima wa Apwiya khonaamallelle. Ekaamba ya yeella Apwiya ahaashella murima nave ahaattaphurusella athwaayo nnatta wi ewiiphe.

¹⁸ Vawi onanara wa athu onakhara wonanko munllo wawoosa miiwa ddoohiyanahiyana. Onnashellellihattho otthako nave mwiisiiwa onakhalla wonanko murapo wawiitivalla.

¹⁹ Ekaamba ya yeella, osha murima wa Apwiya Amasiva Mattheene wohoosa ellapo nave athu tti wonanko ekhuni vawi khaavo muthu anammoriwella ethakaraka mukhwaaye.

²⁰ Ni nnattanatta ennaakha ni ocha koma khenavona nave o nnatta noonyottho ennaakha ni ocha koma ennavirellella ovolliwa ettalla sika ennattakhunana.

²¹ Amanase ni Aefuremu enawana amoddamoddave navettho eellaalla vamodda enawana ni Yuda. Komave osha murima wa Apwiya khonaamallelle ekaamba ya ddenndda nave muwonwiiwa tti woottaphurusattaphurusa wi yaallake.