Yesaya 8 - Mawu a Mulluku

Mwaana a Yesaya monga echizindikiro

¹ Apwiya yaakilleella wi, “Okuse yoolembavo yuullupalli nave olembevo ni malemba oodduwanyeya phaama wi ‘Woononga Mwawaakuva Waakha Moohiselliha.’ ”

² Sika kahaaphwanya amboni oororomelleya eelli, mullupa mukutho Uriya ni Zekariya mwaana a Yeberekiya.

³ Viviralle enthawi mwaaraka aakusa erukullu nave aamuyara mwaana aamullopwana. Vaavo Apwiya yaakilleella wi, “Omuvahe nnddina nawi ‘Woononga Mwawaakuva Waakha Moohiselliha’.

⁴ Vawi mwaanooyo ahinaambe wiithana wi ‘Attiitthi’ apaalle wi ‘Amoowe’ eyuuma ya Damasiko ni ddawaakha dda Samariya ddineerokusiwa ni mwene a o Asiriya.”

Owa wa mwene a o Asiriya

⁵ Apwiya yaakilleella wiilli wi,

⁶ “Athu a ellapweella aakhoota maaddaaka o Shilowamu aweeta moomaalleya nave enaahakallallella mwene Rezini ni mwaana a Remaliya.

⁷ Ekaamba ya yeella mi Apwiya kineerewaarumihella mwene a o Asiriya ni akhotwaaye wi emuhelle ekhoto Yuda. Enaawe wonanko echigumula ya maaddi a muhinje wa Yufurate oosefukella va ekhopella ddaye ddittheddene.

⁸ Eneerovollowa mwamasiva mu ellapo ya Yuda nave ophiyera emukomelle munikohini.” Mulluku ari ni hiyaano vawi aneerottaphurusa muuphellwaaye okhuneellana ellapo ettheene.

⁹ Nyu mitundu ddimodda dda athu tthukumanani mwawoova nave mutthukumelle. Nyu ellapo ddittheddene, iwesesani. Warani ddakhoto komave muneerokotholliwa. Ddawoona, warani ddakhoto komave muneerewinttakiwa.

¹⁰ Naari mwiiwanane koma mwiiwananooyo khophura ello. Mupanganelle ddaweera komave khaddiworeya vawi Mulluku ari ni hiyaano.

Apwiya enamuchenjeza namallotella

¹¹ Apwiya yaakilangiza mwamasiva nave yaakichenjeza wi kihithwareke ettilla dda athwaalla. Yaallota wi,

¹² “Muheeseke wi tti owukila wonanko athu alla eneeselliiwa, muhooveke nnddo enooviiwa nave muhitthukumelleke.

¹³ Koma Apwiya Amasiva Mattheene muweeseke aweella nave oophwanella owoova ni waatthukumellella

¹⁴ vawi enaakhalle wonanko nipuro noopatuleya. Koma wa athu a o Yuda ni a o Yerusalemu enaakhalle wonanko nlluku nookwakwatuwiha apaalle nookuha. Wa athu a mu Yerusalemu, anaakhalle wonanko musampha ni nikhatto.

¹⁵ Nave athu anchichi aneerokwakwatuwa ni wiikuha. Eneeromakiwa m'musamphani ni ophariwa.”

Ochenjeza dda oveka ezeru wa minepa dda ookhwa

¹⁶ Owumake phaama ombonoolla nave waamarelle mawu yaalla variyari va oohudderaaka.

¹⁷ Kineerewaatiyerella Apwiya ayo yiipitthihalle ekhoviiwa va nibanja na Yakobo nave kineereewaatiyerellesesa.

¹⁸ Ngoonani, kiri mva vamodda ni anamwani kavahiweemi ni Mulluku. Niri echizindikiro ni ddoodduwelliha wa Aisraele ddoovenyera wa Apwiya Amasiva Mattheene ayo enakhalla va mwaango wa Ziyoni.

¹⁹ Vano athu eneerewuulleellani wi, “Khaweni mwakohe wa oollota ni minepa ni wa awoombesa ayo enamwinlla namame nngu etokollollaka. Ethiyo athu khenaveka ezeru wa athu a milluku ddiwa? Ethiyo athu ennaya wa ookhwa wi yaavekella ezeru athu ookumi,

²⁰ wi yaakhellewo mawu oophara murima ni malangizo? Alliwa yaahillota moollikana ni mawu alla, ddawoona khewaasella.”

Enthawi ya ddoohoosa

²¹ Athu eneereweeteeta mu ellapo eri ootopa ni ettalla. Ekaamba ya ettalleeyo, eneerekosimwa ni oweha oddullu nngu emutembelelaka mweniiwa ni Mullukwiiwa.

²² Koma voowehani ellapo, enoone ddoohoosave ni epiphi yawoopiha ni yookhupanyiha nave eneerovokhelliwa mu epiphi yawoopiha.