Yesaya 7 - Mawu a Mulluku

Othenga wooya wa Ahazi

¹ Enthawi eyo Ahazi mwaana a Yotamu, edduullu ya Uziya, aariiye mwene a o Yuda, Rezini mwene a o Siriya ni Peka mwaana a Remaliya, mwene a o Israele, yaawa o Yerusalemu wi ehelle ekhoto muzindooyo koma kheyaawugonjihalle.

² Nibanja na Davide niiwalle wi ellapo ya Siriya yohiiwanana ni ya Efuremu, mwene ni athwaaye yaatthukumella wonanko miteekho dda muutthakoni ddinatikhiwa ni ephevo.

³ Sika Apwiya yaamulleella Yesaya wi, “Mukuse mwanawo Sheariyashubu mwakumane ni Ahazi wookomella engalande yamaaddi yoovenyera o nthiya noomwaako va musewu muullupalli wooya o emata ya Muthu Eeruso Yaweelliha Ekuwo.

⁴ Wamulleelle wi achenjere, akhurumuwe, ahoove nave murimaaye ohifooke ekaamba ya owalli wa osha murima wa Rezini ni ellapwaaye ya Siriya ni wa Peka mwaana a Remaliya. Alliwa tti wonanko mwiisi woothuwa shisha.

⁵ Mwene a o Siriya ni mwene a o Efuremu ahiiwanana wi eweerelleni ddoonanara. Alliwa eni

⁶ ‘Hankoni nallipane ni woopopiha ellapo ya Yuda. Nayigonjihe wi ekhalle yaahu nave wenko namuvollochihe omwene mwaana a Tabeele.’

⁷ “Koma Apwiya Mulluku aallota moosimikiza wi ddennddo khaddiworeya, khaddiwa ddeereya naari vang'ono.

⁸ Vallethi ellapo ya Siriya enaroromella muzindiiwa muullupalli wa Damasiko nave Damasiko anamuroromella mwenaaye. Koma ddihinamalle miyakha 65, Efuremu aneerotthollosiwa, khakhallattho mutundu wa athu.

⁹ Ellapo ya Efuremu enaroromella muzindiiwa muullupalli wa Samariya nave Samariya anamuroromella mwenaaye Peka. Mwaahillipa mu echikhulupililwaanyu, khamukeraattheya.”

Echizindikiro ya Imanuele

¹⁰ Apwiya yaallotattho ni Ahazi oweella mwa Yesaya wi,

¹¹ “Oveke echizindikiro wa Apwiya Mullukwaawo. Ttuukhalla yoowallamella wonanko ellapo ya ookhwa apaalle yoorekamella wonanko oddullu.”

¹² Koma Ahazi aallota wi, “Mi ngiveka echizindikiro apaalle oweesa Apwiya.”

¹³ Sika Yesaya aallota wi, Ngiiwani vano, nyu edduullu ya Davide! Ethiyo khonuukwakhwaneni waatopiha athu munapaalleenyu omutopiha naari Mullukwaaka?

¹⁴ Ekaamba ya yeella Apwiya weekhiiwa eneerewuuvahani echizindikiro. Ngoonani, namwalli aneerokhalla ni erukullu nave aneeromuyara mwaana aamullopwana nave aneeromuvaha nnddina nawi Imanuwele.

¹⁵ Anaacheke mukaka woonyuunya owaaka enwi ophiyera adduwenlle okhoota yoonanara ni otthoolla yaphaama.

¹⁶ Koma enthawi yeeyo ehinaphiye, ellapo dda mamwene meelli enawoopopihanaayo enaakhalle etthattuwalle matepe.

¹⁷ Apwiya eneerowaana va nyuwaano, va athwaanyu navettho va nibanja na attiitthaanyu mallapo a ddoohoosa awi khenooneyeke ovenyera enthawi eyo Efuremu amwallanneeye ni Yuda, sika wi mwene a o Siriya.

¹⁸ “Enthawi yeeyo Apwiya eneerowiipella mutturu Aiguputo nave eneeroowa anchichi wonanko engwillihi ovenyera wookomella enthambi dda muhinje wa Nailo. Eneerowiipellattho Aasiriya nave eneeroowa anchichi wonanko enwi.

¹⁹ Attheenaayo eneerophiya ni okeraattheya o mapuro mattheene a matapo oowallamella, mitthari dda m'mallukuni, mu makukhu a miiwa ni mapuro oochihellawo enama.

²⁰ “Yaphiya enthaweeyo, Apwiya eneeromulemba oochema oovenyera okhopella wa muhinje wa Yufurate oyo tti mwene a o Asiriya. Ni nchemo naye aneerewuuchemani meehi a omuruni, a vamwiillini ni ereru ddene.

²¹ Yaphiya enthaweeyo, muthu anaasunge eng'ombe eng'onong'ono emodda ni enkhosa piilli.

²² Komave aneerophwanya mukaka munchichi, mwawi aneerekocha phaama wunchichi. Vawi arive muthu anaahalle mwiillaponimmo anaacheke mukaka woonyuunya owaaka enwi.

²³ “Yaphiya enthaweeyo, emata ddampesa ddaphaama nnddo ddiri ni miteekho 1,000 nave mutengwiiwa tti makobiri a siliva 1,000 muneeromella miiwa ddoohiyanahiyana.

²⁴ Athu eneeroyaawo wi yasaye enama eri ni miira ni mipaamba vawi mu ellapo ettheeneeyo munaakhalle miiwa ddoohiyanahiyana.

²⁵ Nave m'miyaangoni mutthemwene mwallimiwa athu khephiyamo woova miiwa ddoohiyanahiyana. Mapurwaayo eneerotthattuwa moochihellamo eziweto ddoohiyanahiyana.”