Yesaya 66 - Mawu a Mulluku

Apwiya enaweeruza athu a mitundu ddimodda

¹ Apwiya enallota wi, “Oddullu sika mpandwaaka woomwene, ellapo yavatthi sika voonyingallavo manyallwaaka. Ethiyo munaakimakelle enyumba yawiidde? Niri wuuwi nipuro nawiithuuwellamo miyaano?

² Ddeko ddittheddenenndda kaddiphatusalle tti miyaano, sika ddittheddenenndda tti ddaaka. Miyaano kinnahakallalla ni athu awiiyeviha ni oolapa, ookoova ni awiiwellella mawaaka.

³ “Koma vookhalla amodda eneera ddawaaddivella. Wa alliwa tti emoddamoddave omwiipha nankhoro a eng'ombe apaalle omwiipha muthu monga mukutho, omwiipha mwaanaankhosa apaalle omwiipha mwanapwa monga mukutho, ovelleella yoocha apaalle ovelleella nikhame na ekumba monga mukutho, ovelleella mukutho wa yawuupusella wa lubani* apaalle ollapella mafano. Athu yaalla murimiiwa onnahakallalla ni ddoonanara.

⁴ Sika miyaano kineerewaallaka nave kineerowoopopiha kaambiiwa kheyaawaakhunlle kawiithaneemi apaalle waapella maaru mvo kalloteemi. Yaheera ddoonanara vamiitthoni vaka, yaatthoolla weera ddeko ddookinanara.”

⁵ Nyu ootthukumella Apwiya yaallotaka, iwani mawu a Apwiya. Alliwa enallota wi, “Abalaanyu ayo eniitana ni nyuwaano ni wuukhootani ekaamba ya nnddina naka enallota wi ‘Apwiya etitimihiwe wi hiyaano noone ehakallallwaanyu.’ Koma alliwa sika enaawulliwe muru.

⁶ Ngiiwani winlla woovenyera mu muzinda! Ngiiwani mawu mu enyumba ya Mulluku, mawu a Apwiya vawaahokollosellani ddoonanara adaniiwa.

⁷ “Muzindaaka tti wonanko mutthiyana oyo anamuyara mwaana ahinaambe wiiwa ovoreya oyo anamuyara mwaana aamullopwana ereta ehinattatthamuwe.

⁸ Ttaani aambilleke wiiwa ddenndda? Ttaani aambilleke oddoona ddenndda? Ethiyo ellapo ttuuyariwa nllapo nimodda? Ethiyo mutundu wa athu ttuuyariwa nllapo nimodda? Koma Ziyoni ahaayara anaaye aallopwana ahinaambe woona ovoreya.

⁹ Ethiyo mi ttuuwaaphiyiha athwaaka enthawi yooyara koma oohiwiithuuwiha?” Apwiya sika enallota. “Ethiyo mi kinayariha ttuuwalla erukullu?” Mullukwaawo sika anallota.

¹⁰ Hakallallani ni Yerusalemu, muthapelle ekaamba ya olliye, nyu attheene ookonda muzindoolla. Nyu attheene muninllella muzindoolla, hakallallani ni olliye moothapella.

¹¹ Muneerewaamwa ni ovona ni mapelle a ddookhurumusa murima ddaye, muneerowamulla mukaka ni ohakallalla ni waata wa oriiheya waye.

¹² Apwiya enallota wi, “Kineerewuuvaha murendelle wonanko muhinje. Eyuuma ya mitundu dda athu eneeroowa wa weyaano wonanko muhinje woosefukella. Munaakhalle wonanko mwaana awaamwa oyo amennya emuupaarelle vakhwipi apaalle enamuttotthella vamakutthani.

¹³ Kineerewuukhurumusani murima o Yerusalemu wonanko mmo mutthiyana anamukhurumuselleeye murima mwanaye.

¹⁴ Muneerohakallalla vawoonani ddenndda vawi makhuvaanyu eneerewunnuwa wonanko munyepu. Sika muneerodduwella wi mi Apwiya kinnaakavihera oorumeyellaaka nave kinnaananariwella adanaaka.”

¹⁵ Vawi ngoonani, Apwiya eneeroowa ni munllo nave magaretiiwa eneerophiya wonanko ephevo namangalle. Alliwa eneerewooniha vaweella owalliiwa nave eneerewaallaka adaniiwa ni mallumi amunllo.

¹⁶ Eneerewaallaka athu attheene a va ellapo yavatthi ni munllo ni nsupada nave anchichi eneerewiiphiwa ni Apwiya.

¹⁷ Apwiya enallota wi, “Ayo eniipatulla ni oddeelliha weekhiiwa vooyaani o emata ddiwa ddoopatuleya nimodda ni oohoollelliiwa, ennacha enama yeekumba, emete ni ddooripiha ddimodda, attheenaalla enaamallelle nimodda.

¹⁸ Kinnadduwella mitteko ddiwa ni maganizwiiwa. Nave kinimawa wi kaatthukumanihe athu a mitundu ddittheddene ni a ellotello ddittheddene. Ddawoona, eneeroowa nave eneerewoona ntitimiho naka.

¹⁹ Kineerohiya echizindikiro vamiitthoni viwa. “Koma vineerokhalla amodda oovulluwa ayo kinaawaarumeemi wa athu a mitundu ddimodda wonanko a o Tarishishi, a o Puti, a o Ludi vamodda ni eeruswiiwa dda miira, a o Tubala, o Yavani ni o ellapo ddawoorekama ayo ehiniiweke dda epillaaka apaalle woona ntitimiho naka. Alliwa eneerollalleya dda ntitimiho naka variyari va athu a mitundu ddimodda.

²⁰ Nave eneerowaana abalaanyu attheene ovenyera wa athu a mitundu ddimodda wi ekhalle emphaso wa miyaano. Eneerowaana o mwaangwaaka waweella o Yerusalemu abalaanywaayo yaawellihalle va akavalo, abulu, ekamira,* magareta ni machira. Eneerowaana wonanko Aisraele yaawaakana ddoovelleella dda yoocha o enyumba ya Mulluku, addikusalle mu embale ddoopatuleya.

²¹ Nave amodda mwa alliwa kineerewaatthattusa allupa mukutho ni Alevi. Apwiya sika enallota.

²² “Wonanko mmo ellapo yavatthi yanaanweene ni ellapo yooddullu yanaanweene nnddo kinaddiphatuseemi ddinaakhalle wa enthawi yoohimalla vamiitthoni vaka emoddamoddave yeeyo edduullu ddanyu ni nnddina nanyu ddineerokhallavove.

²³ Athu a mitundu ddittheddene eneeroowa okillapella o Yerusalemu va erive Ehakallallo ya Wooneya wa Mweeri ni nirive nllapo na Sabata,” Apwiya aallota.

²⁴ “Nave alliwa eneerokhuma ni woona mitembo dda athu ayo yakiwukilalle vawi mapwihiiwa khewa ekhwa, munllwiiwa khowa othiimihiwa nave eneerekewaananara athu a mitundu ddittheddene.”