Yesaya 65 - Mawu a Mulluku

Ollaka ni ovullusa

¹ Apwiya yaallota wi, “Kaaddoonihella meekha wa ayo yahikivekille nave kaaphwanyiwa ni ayo yahikaashille. Wa mutundu oyo ohinakiithaneke kaallota wi, ‘Kiri vaava, kiri vaava.’

² Nllapo nittheene kaawaakhella ni mattaaka mattheene mutundu olla woohiiwellella ni woowukila, waweera ddoonanara voothwarani ettilla ddiwa ni ddoopaalla ddiwa.

³ Alliwa moohiwulliwa muru ennakishiha murima. Ennavelleella mikutho mu emata ddoopatuleya nave ennoosa lubani* va makuwa eenjerwa.

⁴ Mahiiyu ennaseddera o mahame ni o mapuro awiipittheya nave ennacha enama ya ekumba ni owirya ephwaddi ya enama ddoovelleelliwa mikutho ddeelleto.

⁵ Nave ennaalleella amodda wi, ‘Venyanivoni, muhinaatamelle kaambiiwa hiyaano tti oopatuleya.’ Miyaano ngiwora ovillella ni athu yaalla vawi owallaaka va alliwa tti wonanko munllo woohithiima.

⁶ Ngeera ellapo tuu, mullatwiiwa koowulemba khalle. Ddawoona, kineerewaahokollosella ddoonanara ddiwa.

⁷ Kineerewaallakattho ekaamba ya machimwiiwa ni machimo a makhollwiiwa. Yahoosa lubani va miyaango nave yaakivevulla va asimiyaango ddiwa. Sika miyaano kineerewaallaka moollikana ni nnddo yeerilliiwa.”

⁸ Apwiya enallota wi, “Vinyo akhallamove mu mpesa athu ennallota wi, ‘Muhoononge vawi ddooddiva ddookhallamove.’ Emoddamoddave yeeyo miyaano kineeroweerella athwaaka, ngiwoononga attheene.

⁹ Kineerokhumiha edduullu mwa Yakobo ni mwa Yuda nave eneerewaakhella ellapwaaka yamiyaango wi ekhalle yoohallaniiwa. Ddawoona, athwaaka ootthoolliwa eneerewaakhella, oorumeyellaaka eneerokhalla wenko.

¹⁰ Wa athwaaka ookaashaasha, ntapo na Sharoni ninaakhalle woochihella enkhosa nave ntapo na Akori nineerotthattuwa nipuro nawiithuuwellavo mulloko wa eziweto.

¹¹ “Koma nyu awaakhoota Apwiya ayo munatiwalla mwaangwaaka waweella ayo munamullapella Gadi ni Meni, milluku ddoowiiha ekari ni otulli,

¹² attheenenyu kineerowiiphani okhotoni. Ddawoona, attheenenyu muneerewiiphiwa kaambiiwa khamwaakhunlle kawiithaneemini nave khamwiiwalle kalloteemi koma mwaheera ddoonanara vamiitthoni vaka. Nave mwaatthoolla nnddo kihinapaalleemi ohiri ohakallalla ni ddaphaama.

¹³ Sika Apwiya Mulluku enallota wi, ‘Ngoonani, oorumeyellaaka eneerocha koma nyuwaano muneerokhalla ni ettalla. Oorumeyellaaka eneerowirya koma nyuwaano muneerovolliwa nthona. Oorumeyellaaka eneerohakallalla koma nyuwaano muneerowulliwa muru.

¹⁴ Oorumeyellaaka eneerewiipa moohakallalla koma nyuwaano muneerewinlla wunchichi ekaamba yovoreyiwa murima. Muneerewinlla mookhuwa ekaamba ya yookatamihiwa m'murimani.

¹⁵ Athwaaka ootthoolliwa eneeroromolla nnddina nanyu vootembelelani nave mi Apwiya Mulluku kineerowiiphani. Koma oyo anakiiwellella miyaano kineeromuvaha nnddina nanaanweene.

¹⁶ Mwawi ddiiddo ooveka madaliso apaalle ollupella mu ellapweeyo aneereke ddennddo wa Mulluku awoona ekaamba yawi ddoohoosa ddaye ddakhalle ddootiwalliwa nave ddoovenyihiwavo vamiitthoni vaka.’ ”

Ophatusiwa wanaanweene

¹⁷ Apwiya enallota wi, “Kinaphatusa oddullu wanaanweene ni ellapo yavatthi yanaanweene nave ddakhalle khaddiwa dduupuwelliwattho, ddineerotiwalliwa.

¹⁸ Koma nyu khallani oohakallalla ni oothapella wa enthawi yoohimalla ekaamba ya nnddo kinaddiphatuseemi. Vawi ngoonani, kinamuphatusa Yerusalemu anaanweene ooddalla ni othapella nave athwaaye enaakhalle oohakallalla.

¹⁹ Mwaneenaaka kineerohakallalla wunchichi ekaamba ya Yerusalemu ni athwaaye. Wenko khowa wiiweyattho winlla apaalle okhupanya.

²⁰ Khowa okhallattho anamwani ookhwa eri awaamwa nave awuulluvalla attheene eneerekokwakhwaniha miyakha ddiwa ddittheddene. Ookhalla ni okumi ophiyera miyakha 100 enooneyeke wonanko musombwe nave okhwa ddihinakwakhwane miyakha 100 ddinooniheke otembeleliwa.

²¹ Athu eneeromaka enyumba ni okhallamo nave eneerollima emata ddampesa.

²² Kheyaamakella enyumba athu amodda wi ekhallekemo nave kheyaalla mipesannddo wi athu amodda echeke ezipaso ddiwa. Athwaaka eneerokhalla ni okumi woorekama wonanko miteekho. Nave athwaaka ootthoolliwa eneerohakallalla ni mitteko dda mattiiwa enthawi yoorekama.

²³ Khewa ephara mutteko nivuddo apaalle waayarella anamwani wi yoone otulli kaambiiwa enaakhalle athu oodalisiwa ni Apwiya alliwa ni edduullu ddiwa.

²⁴ Kineerowaakhulla ehinamallihe wiithana nave kineerowiiwa ehinamallihe ollota.

²⁵ Mumbulu ni mwaanaankhosa eneerekochella vamodda nave mukango oneerekocha munyepu wonanko eng'ombe navettho nthupi sika ninaakhalle yoocha ya enowa. Va mwaangwaaka waweella wa Ziyoni khaviwa vikhalla ello yoovoreya apaalle yawoononga.”