Yesaya 64 - Mawu a Mulluku

¹ Nyu Apwiya, waphaama mwatthanlleke muddullu wi mukitthe vatthi. Miyaango ddaaweerotikheya voowoonani nyuwaano,

² wonanko mmo munllo onashellihelliiwa nihaka navettho wonanko mmo onaviddullelliiwa maaddi wi adanaanyu yuudduwelleni nave wi athu a mitundu ddimodda etthukumelle vamiitthoni vanyu.

³ Enthawi emodda mwaakittha vatthimva mweera ddeko ddawoopiha nnddo nahidditiyerelleehu. Miyaango ddaatthukumella ni woova voowoonani.

⁴ Waambeella khalle khaavo oyo oonille apaalle iiwalle dda Mulluku mmodda oollikana ni nyuwaano, ooweerella ddawi ddiidda athu ootiyerella va olliye.

⁵ Munnawaakhella attheene ookonda echilungamo, aweeseesa weeta moollikana ni opaalla wanyu. Ddawoona, mwaanishella murima komave hiyaano naavirellella ochimwa. Noochimwa wa enthawi yoorekama. Ethiyo vano ninoopolliwe mwawiidde?

⁶ Attheene niri wonanko athu ooripihiwa nave naari mitteko ddahu ddittheddene ddaphaama ddiri wonanko ekuwo yooripihiwa. Attheene ninnanyaalla wonanko makattha, ninnahahareya ni machimwaahu wonanko ninakakhiwa ni ephevo.

⁷ Khaavo aniithanella va nnddina nanyu voovekellani apaalle anatikheya ni ddooveka nikavihero wa nyuwaano. Mohiipitthiha ekhovaanyu nave moonitthattusa akaporo a machimwaahu.

⁸ Komave nyu Apwiya muri attiitthiihu. Niri wonanko olloko nave nyuwaano muri wonanko awoopa vawi niri mitteko dda mattaanyu.

⁹ Nyu Apwiya, muhivirellelle onishella murima ni wuupuwella machimwaahu wa enthawi yoohimalla. Ngoonani, attheene niri athwaanyu.

¹⁰ Mizinda ddanyu ddaweella ddootthattuwa echipululu, Ziyoni ootthattuwa nihaka, Yerusalemu ootthattuwa mukhwaadduni.

¹¹ Enyumbaanyu yaweella ni yooreera mmo makhollwaahu yuullapelleewanimo yooshellella ni munllo. Navettho mapuro mattheene naakondeehu aatthattuwa matepe.

¹² Nyu Apwiya, mweerelle tini ellapo tuu? Ethiyo mukhurumuwelle tini oohillota ello! Munanihoosella tini wunchichi?