Yesaya 63 - Mawu a Mulluku

Weeruziwa wa adani a Apwiya

¹ “Ethiyo ttaani anavenyera o Edomu, awanre ddoofiira dda o Bozira? Ethiyo ttaani awanre ddoowara ddooreera, aneeta mookotella masivaaye?” Tti miyaano oollalleya echilungamo ni amasiva oovullusa.

² Ethiyo kaambiiwa tini ddoowara ddanyu ddifiiralliiwa navettho ddinooneyiiwa wonanko dda oovota mpesa?

³ “Koovota mitundu dda athu ddimodda wonanko mpesa nave khaavo naari mmodda oyo akikaviherille. Kahaavota kishille murima nave kahaanyingallella moowalli mwawi kahiinthamusella nikhame.

⁴ Vawi nllapo noohokollosella ddoonanara niri m'murimani mwaka nave muyakha woowoopolla athwaaka woophiya.

⁵ Kaawehaweha koma khaarivo ookikavihera, kaattikhina wunchichi wi khaarivo ookillipiha. Sika kapambanille ni masivaaka nave osha murima waka waakillipiha mwiilli.

⁶ Kahaavota athu a mitundu ddimodda kishille murima nave kahaanyingallella. Nikhame niwa kaaniithella vatthi.”

Apwiya enamweerella ddaphaama Israele

⁷ Kineerollota dda echikondi yoohisintheya ya Apwiya, kineerewaatitimiha ekaamba ya ddittheddene eneerenlliiwa. Ahaadalisa wunchichi athu a o Israele, voothwarani echifundwiiwa ni wunnuwa wa echikondiiwa yoohisintheya.

⁸ Apwiya enallota wi, “Alliwa tti athwaaka, anaaka ayo ehinaakoottotthe,” sika yahaavullusa.

⁹ Mu ddoohoosa ddiwa ddittheddene alliwa aahoowa. Mungelo oovenyera wa alliwa ahaavullusa nave aawoopolla mwa echikondiiwa ni echifundwiiwa. Sika Apwiya ennaapwatha wonanko anamwani ovenyera khalle.

¹⁰ Komave athu yaawukila ni omoriha ethakaraka munepiiwa waweella. Sika Apwiya aatthattuwa mudaniiwa nave aawanana.

¹¹ Vano athu yahuupuwella dda enthawi yakhalle, mallapo a Mose oorumeyellaaye nave yaakoha wi, “Ethiyo eri wuuwi Apwiya ayo yaavullusalle athwiiwa ni oohoollella a mullokwiiwa va enyanja? Ethiyo eri wuuwi Apwiya ayo yahiyalle mwa athwiiwa munepiiwa waweella?

¹² Ethiyo ttaani oyo eerille ddeko ddoottikhiniha ni masivaaye muullupalli oweella mwa Mose? Ahaakawa maaddi a mu enyanja athwaaye yoonaka wi nnddina naye nititimihiwe wa enthawi yoohimalla.”

¹³ Ethiyo ttaani aweetihalle va enyanja yoowelleella nave wonanko kavalo aweeta muchipululuni oohikwakwatuwa?

¹⁴ Munepa wa Apwiya wahaavumiha wonanko mmo ddiniithuuwella eng'ombe o ntapo. Sika nyu Apwiya mwahaahoollella athwaanyu wi nnddina nanyu nititimihiwe.

Oveka nikavihero

¹⁵ Nyu Apwiya oddullunko, o nipuro nanyu naweella ni nantitimiho, nooneni. Ethiyo opwatha wanyu ni masivaanyu ddiri wuuwi? Moohiya onoonihella echikondaanyu ni echifundwaanyu.

¹⁶ Vawi nyuwaano sika attiitthiihu naari Abrahamu ahinidduwellaka navettho Israele ahinaakhullaka. Koma nyu Apwiya muri attiitthiihu, oonoopollaahu waambeella khalle.

¹⁷ Ethiyo munanihollosella tini va ettilla ddanyu? Ethiyo munanaakhullellella tini wi nikhalleke awumma murima ophiyera khannawoovanittho? Hokollowani ekaamba ya oorumeyellaanyu, malloko a athu ayo eri yoohallanaanyu.

¹⁸ Athwaanyu oopatuleya yakhanlle ni nyuwaano wa enthawi yooyeva koma adanaahu yaanyingallella enyumbaanyu yoopatuleya.

¹⁹ Niri wonanko athu ehinalamulelliweke ni nyuwaano, wonanko khannakhalleke athwaanyu.