Yesaya 62 - Mawu a Mulluku

¹ Ekaamba ya Ziyoni ngeera ellapo tuu, ekaamba ya Yerusalemu ngiithuuwa ophiyera echilungamwaaye yooneyille vaweella wonanko owala, ovullusa waye wonanko mutthiko wookhara.

² Mitundu dda athu ddineerowoona olungamihiwe, mamweniiwa mattheene eneerewoona ntitimiho niwa. Eneerewiithaniwa ni nnddina nanaanweene, nno Apwiya mwaneeniiwa enuuvahiiwa.

³ Onaakhalle wonanko enduwira yoomwene, yooreera m'mattani mwa Apwiya, wonanko korona* antitimiho m'mattani mwa Mullukwaawo.

⁴ Khowa oromolliwattho “Oohiyiwa.” Ellapwaawo khewa eromolliwattho “Echipululu.” Koma vano onaaromolliweke “Kinnahakallalla ni olliye.” Ellapwaawo enaaromolliweke “Ootthelliwa moohakallalla” ekaamba yawi Apwiya ennahakallalla ni weyaano, onaakhalle wonanko ootthella a ellapwaawo.

⁵ Wonanko musombwe anamutthella namwalli, anaawo aallopwana eneerewuutthella weyaano. Wonanko ootthella anamuhakallallella ootthelliwa, Mulluku aneerewuuhakallallella weyaano.

⁶ We Yerusalemu, va mipanda ddawo kohaahiyavo alonda, otthaana ottheene ni mahiiyu mattheene khaweera ellapo tuu. Nyu munawuupusa Apwiya, muhiithuuwe.

⁷ Muhihiye wuupusa ophiyera emmakillettho Yerusalemu ni otthattusa muzinda oyo onaatthamalliwe ni ellapo yavatthi.

⁸ Apwiya yaallupella ni murimiiwa muttheene, eneerosunga ollupellanko ni masiviiwa. Yallotille wi, “Adanaawo khemuchattho tirigwaawo, alleto khemuwiryattho vinywaawo.

⁹ Koma nyu mwamwanlle ni omuhata, sika munaamuche buledi, muneerewaatitimiha Apwiya. Nyu mwapwatha miteekho ddampesa, ni orukulla ezipaso ddampesannddo sika munaamuwirye vinyo m'mathatoni a enyumbaaka.”

¹⁰ Khumellani, khumellani vamullakonimvo, apotokoselleni ettilla athu! Llimani, llimani musewu, venyihanimoni malluku, imesani embendela wi mitundu dda athu ddooneke.

¹¹ Apwiya enimawa ni mallivellwiiwa aahoolliha yoothuviiwa. “Ovullusa wanyu onimawa. Apwiya enimawa ni emphotwiiwa, enimawaana ddawuuphwanellani.”

¹² Muneeroromolliwa oopatuliwa a Mulluku, athu awoopolliwa ni Mulluku. We Yerusalemu, oneeroromolliwa wi, “Muzinda Wookondiwa ni Apwiya, Muzinda Woohihiyiwa ni Mulluku.”