Yesaya 61 - Mawu a Mulluku

Othenga waphaama wa ovullusiwa

¹ Munepa wa Apwiya Mulluku ari va miyaano ekaamba yawi Apwiya aakizoza. Aakirumiha wi killalleye othenga waphaama wa oohoowa wi kaallipihe ootathilla murima, kallalleye ottaphulliwa wa akaporo, navettho ottaphulliwa wa oomakeya.

² Aakiruma wi kallalleye muyakha wa echifundo ya Apwiya, nllapo nawaahokollosella ddoonanara adaniiwa. Aakirumattho wi kaakhurumuse murima awinlla,

³ kaamaallihe ayo eninlla o Ziyoni, wi kiwinnye enduwira yeehakallallo munipuroni mwa ntuura neethakaraka, wi kiwinnye makhura eehakallallo munipuroni mwa winlla, wi kiwinnye yoowara yeehakallallo munipuroni mwa otathilla murima. Sika eneereweeriwa miteekho ddamasiva ddeechilungamo ddawaalliwa ni Apwiya wi mwaneeniiwa yaakhelle ntitimiho.

⁴ Eneeromakattho matepe akhalle a muzinda, eneeroddiimesa enyumba ddawoonongeya. Eneeropotokosattho mizinda ddoopasuliwa navettho mapuro oohiyiwa waambeella khalle.

⁵ Alleto eneerekewuurumeyellani, eneerekochiha eziweto ddanyu, eneerekollima emata ddanyu navettho emata ddanyu ddampesa.

⁶ Koma muneerekoromolliwa allupa mukutho a Apwiya, muneerekeweeriwa oorumeyella a Mulluku. Muneerekoocha eyuuma ya mitundu ddimodda muneerekokotella ntitimiho niwa.

⁷ Owulliwa muru ni onyaambusiwa wanyu ddineeromalla, muneerohakallalla ni echigawaanyu. Ellapwaanyu eneerewoonjereriwa, muneerothapella wa enthawi yoohimalla.

⁸ Apwiya enallota wi, “Mi kinnakonda echilungamo, kinniitana ni ddawiiya ni ddoonanara. Athwaaka kineerewaathuva moororomelleya, kineerokeraatthihana echipangano yoohimalla.

⁹ Aniiwa eneerodduwanyeya variyari va mitundu ddimodda, edduullu ddiwattho ddineerovuwa variyari va athu attheene. Arive muthu oowoona aneerowella wi tti athu oodalisiwa ni Apwiya.”

¹⁰ Vano kineerohakallalla wunchichi mwa Apwiya, murimaaka oneerottaphuwa mwa Mullukwaaka. Vawi olliye ookiwariha ddoowara ddoovullusa ookiwariha mukanjo weechilungamo. Mi kiri wonanko ootthella oowara enduwira wonankottho ootthelliwa oowara ddooreeriha ddoowallamella mutengo.

¹¹ Wonanko mmo ethaya enamellihelliiwa mmiddo navettho wonanko mmo emata enunnuwihelliiwa ddawaalla, emoddamoddave yeeyo Apwiya Mulluku eneereweera echilungamo ni ntitimiho niwa vamiitthoni va athu attheene.