Yesaya 60 - Mawu a Mulluku

Oriiheya wamuhoollo wa Yerusalemu

¹ Venya, wala vawi omolleella wawo woophiya, ntitimiho na Apwiya nohuuwalella!

² Epiphi eneerokhuneella ellapo yavatthi, epiphi yawoopiha eneeromorella va athu a mitundu ddimodda. Koma Apwiya eneerewuuwalella, ntitimiho niwa nineerewooneyella.

³ Athu a mitundu ddimodda eneerothwara owala wawo, mamwene eneeroowa o onyezimella wawo wonanko nndduwa naakhumaka.

⁴ Tukhulla miitthwaawo owehewehe nave woone nnddo ddineereya, attheene ahuutthukumanella. Anaawo aallopwana eneerovenyera woorekama, anaawo aatthiyana eneeroyaariwa otulli.

⁵ Oneerewoona ddenndda ni oneerohakallalla, murimaawo oneerothapella. Eyuuma yoonyanja eneerewuuweella, katundu a o ellapo ddittheddene aneerewuuphiyera.

⁶ Mulloko wa ekamira* oneerewuuhuruwella, ekamira dding'onong'ono dda o Midiyani ni o Efa. Attheene a o Sheba eneeroowa, emukusalle golide ni lubani,* eneerewaatitimiha Apwiya moowelliha mawu.

⁷ Eziweto ddittheddene dda o Kedara eneerewuutthukumanihella, anankhoro ankhosa a o Nabayoti eneerewuurumeyella, eneerovelleelliwa vanikuwani na mukutho. Sika mi Apwiya kineeroyivaha enyumbaaka ntitimiho nuullupalli okhwaranya khalle.

⁸ Ethiyo nndda tti tini ddinapallalleya wonanko mirapo, ddiri wonanko ekhunda ddoohokollweella omakhollani wiwa?

⁹ Ddenndda tti esitima ddoovenyera o ellapo ddawoorekama, dda o Tarishishi ddiri vahoollo. Ddinaakitthiha aniinyu ayo emukusalle siliva ni golide wi atitimihe nnddina na Apwiya Mullukwaanyu, ekaamba yawi Aweella Aisraele ahuuriihani.

¹⁰ Apwiya enamulleella Yerusalemu wi, “Alleto eneeromakattho mipanda ddawo, mamweniiwa eneerewuurumeyella. Kahuullaka mvo kashilleemi murima koma vano kineeroweerella echifundo.

¹¹ Millako ddawo ddineerohulliwa enthawi ddittheddene, otthaana ni mahiywiine kheddiwalliwaka sika athu a mitundu ddittheddene eneerowaana eyuumiiwa wa weyaano, yeetaka m'mullokoni mamweniiwa eri vahoollo.

¹² Koma ellapo ni moomwene ayo ehinuurumeyella eneerotthollowa, athu a mitundu ddenndda eneerewoonongeya.

¹³ Oriiheya wa otthako wa Lebanoni oneerewuuweella, wa mitundu miraru dda paini, eneerowaana wi ereerihelle enyumbaaka wi vaatte vaka viriiheye.

¹⁴ Edduullu dda ayo yuuhoosille eneerewuuwaramella moovelleella olemu. Attheene yuunyaambusallevo eneerewuukokhorella vamanyalloni vawo. Eneerewuuromolla wi ‘Muzinda wa Apwiya,’ ‘Ziyoni a Aweella a Israele.’

¹⁵ Naari athu yuuhiyalle ni owiita weyaano, oohivirattho mwa weyaano, kineerowunnuwiha wa enthawi yoohimalla, onaakhalle nipuro na ehakallallo wa mibado ddittheddene.

¹⁶ Wonanko mwaana awaamwa oneerocha eyuuma ya mitundu ddimodda, ni mamweniiwa eneerewuupwatha. Sika oneerodduwella wi mi Apwiya tti Oovullusaawo, Oowoopollaawo, Amasiva a Yakobo.

¹⁷ Kineerewuuvaha golide munipuroni mwa bronzi, siliva munipuroni mwa mukoko, bronzi munipuroni mwa muteekho, mukoko munipuroni mwa nlluku. Awuuwehera kineerewaatthattusa amurendelle, awuulamulella kineerewaatthattusa oolungama.

¹⁸ Eziwawa kheddiwa ddiiweyattho, ellapwaawo khewa yoonongeyattho. Kinaakhalle wonanko mpanda wawuuteteza, oneerokititimiha ekaamba yawuuvullusa.

¹⁹ Khaviwa vipaalleyattho nndduwa wi nuumolleelle otthaana apaalle mweeri wi wuumolleelle mahiiyu. Koma mi Apwiya sika kinaakhalle omolleella wawo woohimalla, miyaano Mullukwaawo sika kinaakhalle owala wawo.

²⁰ Nndduwa nawo khaniwa nivollowattho, mweeraawo khowa othiimattho. Apwiya sika enaakhalle owala wawo wa enthawi yoohimalla, mallapwaawo awinlla eneeromalla.

²¹ Athwaawo attheene enaakhalle oolungama, ellapweeyo enaakhalle yayiwa wa enthawi yoohimalla. Athwaayo tti enthambi kanlleemi, mutteko wa mattaaka, wi kititimihiwe.

²² Naari nibanja ning'onong'ono nineerotthattuwa nlloko, mwananlloko nineerotthattuwa mutundu wamasiva. Kineereweera ddenndda mwawaakuva enthawi yaphiya, mi tti Apwiya.”