Yesaya 6 - Mawu a Mulluku

Mulluku anamwiithana Yesaya wi akhalle namallotella

¹ Mu muyakha oyo mwene Uziya akhwilleeye kaawoona Apwiya akeraatthille va mpando wa omwene wavaddullu ni woowellihiwa. Mukanjwiiwa waari woorekama wunchichi mwawi waaddalla mu enyumbiiwa ettheene.

² Vaddullu viwa vahiimella Aserafi. Arive Serafi aari ni muuphello matthanu ni nimodda ookhuneella ekhove, meelli ookhuneella manyallo nave meelli amoddaayo oovavella.

³ Aserafaayo yaanakhuwellana wi, Aweella, aweella, aweella tti Apwiya Amasiva Mattheene! Ntitimiho niwa nooddalla ellapo yavatthi ettheene.

⁴ Ekaamba ya okhuwanko matthipello a millako ni enyumba ettheene yaatikheya nave enyumba ya Apwiya yaahuruwelliwa ni mwiisi.

⁵ Sika kaakhuwa wi, “Otulli miyaano! Koomalla vawi kiri muthu a eyano yooripihiwa nave kinakhalla variyari va athu a eyano ddooripihiwa. Komave miitthwaaka aawoona Amwene, Apwiya Amasiva Mattheene.”

⁶ Vano mmodda a Aserafi aavavella wa miyaano, akusalle ninkhalla na munllo m'mattani mwaye. Ninkhallanno anithumunlle ni ddoovallella ovenyera va nikuwa na mukutho.

⁷ Nave aakittannya vayanoni ni ninkhallanno allota wi, “Ngoona, koottannya eyanwaawo ni ninkhallanna. Oripihiwa wawo woheellihiwa nave machimwaawo yookhululukiwa.”

⁸ Vatulli viwa kahiiwa mawu a Apwiya awi, “Ethiyo kinaamurume aani? Ttaani anaayeewo munipuroni mwahu?” Nave kahaakhulla wi, “Kookhallavo, kirumeni miyaano!”

⁹ Nave Apwiya yaallota wi, “Khawe waalleelle athu yaalla wi, ‘Wiiwa munniiwa koma khamuniiwesesa nave woona munnoona koma khamudduwellesesa.’

¹⁰ Umiha mirima dda athwaalla, khoowiha maarwiiwa, minyalliha miitthwiiwa wi ehoone ni miitthwiiwa, ehiiwe ni maarwiiwa, ehidduwelle ni murimiiwa nave ehirukunuwe murima wi echirihiwe.”

¹¹ Vaavo kaakoha wi, “Apwiya, ethiyo ddennddo ddineereye ophiyera niini?” Alliwa yahaakhulla wi, “Ophiyera mizinda dditthattuwalle matepe, enyumba ddihinna athu ookhallamo nave ellapo etthattuwalle echipululu.

¹² Kineerewaatthaamihella athu woorekama nave matepe eneerewaata mwiillaponi.

¹³ Naari echigawo yaneekhumi ya athu ehanlle mwiillaponimmo, elliwattho eneerohelliwa munllo. Koma wonanko miteekho dda mwaaka ni dda muthundu ddinahiyeriwiiwa nikoto ddakakathiwa, emoddamoddave yeeyo mmiddo woopatuleya oneerohalla mu ellapo.”