Yesaya 59 - Mawu a Mulluku

Ohumullulliwa ekaamba ya machimo

¹ Ngoonani, muwono wa Apwiya khokhuveyille wi khewora ovullusa apaalle maarwiiwa khekhoowille wi khewora wiiwa.

² Koma machimwaanyu ahuumwallanihani ni Mullukwaanyu nave aaddiipitthiha ekaamba ya machimwaanyu wi ahiiwe munalloteenyu.

³ Vawi mattaanyu yooripihiwa ni nikhame na machimo manchichi. Eyano ddanyu ddoollota ddawoottha ni ddoonanara.

⁴ Khaavo anamwiipa mullatu mukhwaaye moolungama khaavo anaaye o nthato namillatu mwawoona. Enaroromella etthiru, enakhallella ollota ddawoottha. Ddawoona, athu oonanara ennakusa erukullu ya ddoonanara, ennayara makhallello oonanara.

⁵ Eziwembu ddiwa tti ddawoopiha wonanko mooche a evilli komattho tti oofooka wonanko randasi. Oyo anacha mooche a evilli annakhwa nave nattottholliwa nooche nimodda munnakhuma evilli.

⁶ Randasi khanawariwa wonanko ekuwo sika khaniikhuneelliwana. Ddaweera ddiwa tti ddoonanara nave mitteko dda mattiiwa tti ddeechiwawa.

⁷ Enathamakella weera ddoonanara, khenaselliha owiipha athu oohilakwa. Maganizwiiwa mattheene enakhalla va ddoonanara, orive weko enayiiwa ennatthollosa ni woononga.

⁸ Alliwa khenadduwella ettilla ya murendelle nave ddaweera ddiwa ddittheddene khaddinna echilungamo. Eneeta ettilla ddoovirikana nave arive muthu aweetamo khanaphwanya murendelle.

Athu enalapa machimwiiwa

⁹ Athu enallota wi, “Ekaamba ya yeella, echiweruzo yoonirekamella nave echilungamo khenaniphwanya. Ninnaashaasha owala koma ninaphwanya epiphi, ninnatiyerella wi weelle koma nineeta mwiipiphini.

¹⁰ Ninnaapapella esiri wonanko oohoona, wonanko oohikhalla ni miittho. Ninnakwakwatuwa otthaana wonanko misikuwa. Ddawoona, niri akumi komave niri wonanko ookhwa.

¹¹ Attheene ninnathuruma wonanko ezimbalangondo, ninninlla maliro mookhuwa wonanko ekhunda. Ninnaashaasha weeruza koma kheninaphwanya. Ninnatiyera ovullusa koma ori woorekama ni hiyaano.

¹² “Nyu Apwiya, nohuuchimwellani wunchichi vawi machimwaahu ennanivaanyiha, ddoolakwa ddiri va hiyaano nave ninnadduwella phaama.

¹³ Nyu Apwiya, nohuuwukilani, nohuukhootani, nohuuhiyani, nohaambiha ddoonyingallella ni ddeechiwawa nave m'murimani mwahu munnavenyera ddooganiza ni ddoollota ddoolleka.

¹⁴ Echiweruzo woohokollweella mutulli, echilungamo yoorekamella. Yawoona khenaphwanyeyawo nave khenavollowawo.

¹⁵ Yawoona ennaramawo nave arive muthu ookhoota ddoonanara anniittatthamullella ekhoto.” Apwiya yaaddoona ddenndda nave ddahaananara wi echilungamo kheyiivo.

Apwiya enakhozekella owoopolla athu

¹⁶ Yahoona wi khavaari muthu naari mmodda nave yaattikhina wi khavaari aweeravo ookhalla variyari. Vano yaapambana ni masiviiwa nave yahiillipiha ni echilungamwiiwa.

¹⁷ Yaawara echilungamo wonanko yoowara yawiitetezella ekhakadda nave ovullusa wonanko echipewa yawiitetezella omuruni. Yaawara ohokollosella ddoonanara wonanko mukanjo nave osha murima wiwa wonanko yawiikhuneelliiwa.

¹⁸ Apwiya eneerewaallaka adaniiwa moollikana ni ddaweera ddiwa. Eneerewooniha owalli wa owaawukila nave eneerewaahokollosella ddoonanara adaniiwa vawi eneerewaallaka naari ookhalla mu ellapo ddawoorekama.

¹⁹ Sika athu eneerewoova nnddina ni ntitimiho na Apwiya ovenyera wookhuma nndduwa ophiyera woovollowa nndduwa. Apwiya wonanko muhinje woothamaka wookakhiwa ni ephevo.

²⁰ Apwiya enaalleella athwiiwa wi, “Kineeroowa o Yerusalemu waavullusa athu a nlloko na Yakobo ayo yalapille machimwiiwa.

²¹ Kineerokeraatthiha echipangano ni nyuwaano ovenyera ollello ophiyera wa enthawi yoohimalla. Munepaaka oyo ori mwa nyuwaano navettho mawaaka ayo kaahiyalleemi muwano mwanyu, kheddiwa ddivenya muwano mwanyu apaalle mwa aniinyu apaalle mwa edduullu ddanyu wa enthawi yoohimalla.”