Yesaya 58 - Mawu a Mulluku

Ohalla ocha wawoona

¹ Apwiya enallota wi, “Khuwa wunchichi, ohihiyerere! Llipiha okhuwa wonanko nipallapata! Alleelle athwaaka dda olakwa wiwa ni a nibanja na Yakobo dda machimwiiwa.

² Ennakaashaasha nllapo ni nllapo voopaallani wi edduwelle ettilla ddaka. Wonanko mutundu waweera ddoolungama oohihiya malangizo a Mullukwiiwa, alliwa ennakiveka malangizo oolungama nave ennahakallalla okaatamella miyaano Mullukwiiwa.”

³ Athu enakoha wi, “Ethiyo ninahallella tini vawi nyu Apwiya khamunoona? Ethiyo niniikatamihella tini vawiiyevihani vawi nyuwaano khamunapwathawo.” Apwiya enallota wi, “Ollota ddawoona, nllapo nne munahalleenyu ocha, munaashaasha ddeko nnddo ddinuuvaheni mphuro nave munnaahoosa allupa muttekwaanyu attheene.

⁴ Munahallella ocha wi mukanganeke ni owana ophiyera wuukuthana ni ekhonya mwawummellana murima. Ethiyo muneesa wi miyaano ttuuwiiwellella mavekellwaanyu, ekaamba ya ohalla ocha* wawiddiiddanngu?

⁵ Ethiyo ohalla ocha wawi ddiiddanngu tti nko katthoonlleemi? Nyu munnawarama vatthi wonanko manasi, munnaanddellella eziguduli ni ohellavo ntuura wi mukonaatthivo. Ethiyo muneesa ohalla ocha tti wenngu, nllapo nowaahakallalliha Apwiya?

⁶ “Ohalla ocha nko kinapaalleemi tti wawi muttaphulle onyolo woohoosella, muttaphullettho mikwe dda nigoli,* mwaattaphulle oopaneya nave mwinttake nirive nigoli.

⁷ Eettalla mwaakawelleke ddoocha ddanyu nave oorama vookhalla mwaakawellekewo nipuro nanyu, oosiwa mumvaheke yoowara nave mwaakavihereke abalaanyu.

⁸ “Mweera ddenndda muneerowala wonanko ohinase nave makhwataanyu eneerovolla mwawaakuva. Echilungamwaanyu eneerewuuhoollellani nave ntitimiho na Apwiya nineerewuutetezani mutulli mwanyu.

⁹ Mwaavekellaka kineerekowiiwani nave mwaakiithanaka kineerekowaakhullani. “Mwattaphulla nigoli, mwahiya orunellana ni ollota ddoonanara dda akhwiinyu,

¹⁰ mwaawaachihaka eettalla ni waakavihera oohoowa, epiphi eyo ewaapheelleni eneerotthattuwa owala wonanko otthaana.

¹¹ Mi Apwiya kineerewuuhoollellani enthawi ddittheddene ni wuuvonihani ddaphaama navettho kineerollipiha miilli ddanyu. Munaakhalle wonanko emata yoohellelliwa phaama wonanko neetuutu oohiwelleella.

¹² Athwaanyu eneeromakattho enyumba m'matepeni enthawi yoorekama nave va matthipello akhalle. Sika muneeroromolliwa oopotokosa misewu ni oopotokosa mipanda.”

Yoothuviwa voosungani Sabata

¹³ Apwiya enallota wi, “Mwiivaanyiheke weera ddawuuddivellani, muhiphareke mitteko ddanyu nllapo na Sabata. Nllapo na Sabatanna mweereke ello yoohakallalliha nave nllapo naweella na Apwiya ello yooriiheya. Munivaheke olemu nllaponna vooheeteetani, voohipharani mitteko ddanyu navettho voohillotani miyaha ddoohikhalla ni mutteko.

¹⁴ Vano muneerohakallalla mwa miyaano Apwiya nave kineerewuupambanihani va ellapo yavatthi ettheene. Muneeroyichella yoohallana kamuvahilleemi Yakobo nikhollo nanyu. Mi Apwiya koollota ddenndda ni vayanoni vaka.”