Yesaya 57 - Mawu a Mulluku

Ollapella mafano

¹ Oolungama ennakhwa nave khaavo anapwathawo. Athu oororomelleya ennaphariwa nave khaavo aniiwesesa ekaambiiwa. Athu oolungama ennavenyihiwavo wi otulli ohaamorelle.

² Nave ennakhwa mwamurendelle vawi oolungama enniithuuwa phaama yakhwa.

³ Waani wuno nyu athu oochimwa vawi muri wonanko edduullu dda amasenga, ooraruwa ni oohule.

⁴ Ethiyo munattheella ni aani, munamwaaka aani, munamuvevulla aani? Ethiyo anamwani a oochimwa, edduullu dda awoottha, khe nyuwaano? Ethiyo oochimwa khe nyuwaano, awoottha khe nyuwaano?

⁵ Munallapella mafano va miteekho dda muthundu, vatthi va orive muteekho wa enthambi ddoorapa. Munnaavelleella aniinyu monga mukutho m'mataponi, m'mittharini dda m'mallukuni.

⁶ Munaakusa malluku oosalala a mutapo munaallapella wonanko milluku. Munavelleella dda ddoowirya ni dda ddoocha. Ethiyo ddenndda ttuukiddivella?

⁷ Va orive mwaango ni mwanamwaango munnamuhiyavo bedi ooraruwellavo, wenko munnavelleellawottho mukutho.

⁸ Munniimesa mafanwaanyu va ntthella na nchiwi nanyu ni va eferuremwaanyu. Miyaano munnakihiya, munnarulla ddoowara ddanyu, moowella vabeedinaanyu muullupalli ni akhwiinyu ayo munaallivelleenyu wi mukonena wi mukwakhwanihe minkhella ddanyu ddoonanara.

⁹ Munniihella makhura ni ddawunkhella ddinchichi nave munnaya woollapella nifano na Moleki. Munnaaruma amithenga naari o ellapo ya ookhwa.

¹⁰ Munnatopa ni mutunda muneeteenyu koma khamunatathilla murima. Munnaphwanya masiva mamodda wawi khemwaafooka naari vang'ono.

¹¹ Apwiya enallota wi, “Ethiyo tti milluku ddiivi nnddo mwaddoonilleenyu munaddoova ophiyera mwaakitiwallesesa oohikipwatha? Ethiyo moohiya okoova ekaamba yawi koheera ellapo tuu va enthawi yoorekama?

¹² Kineerowoonihella echilungamwaawo yawoottha ni mitteko ddawo koma khophurana ello.

¹³ Mwaakhuwaka opaalla nikavihero, mafanwaanyu yuukavihereni! Ephevo eneerovenyihavo millukunnddo mpweya oneerovavihavo. Koma ayo enakiroromella miyaano eneerewaakhella ellapo yookhallamo ni ovekella va mwaangwaaka waweella.”

Lonjezo na Apwiya na nikavihero ni ochiriha

¹⁴ Vineerewiiweya mawu awi, “Llimani, llimani, okollani musewu. Venyihanivoni erive yookwakwatuwiha mu musewu wa athwaaka.”

¹⁵ Muullupalli ni Amasiva Mattheene oyo arivo enthawi ddittheddene nave nnddina naye tti Aweella anallota wi, “Kinakhalla va nipuro navaddullu ni naweella, kinnakhallattho vamodda ni athu awiiyeviha ni oolapa wi killipihe munepa wa awiiyeviha ni ohihimulla murima wa oolapaayo.

¹⁶ Ngihumullulla wa enthawi yoohimalla apaalle ovirellella waashella murima wi munepa wa muthu ohingomowe vamiitthoni vaka, mpweya woovaha okumi oyo kawuphatusalleemi.

¹⁷ Kaasha murima ekaamba ya osilila wiwa woonanara nave kahaallaka ni waareya etulli komave yaavirellella ohiiwellella ni wummiha murima ni othwara ettilla ddiwa.

¹⁸ “Kahoona mmo yeerelliiwa komave kineerewaachiriha. Kineerewaahoollella ni waakhurumusa murima nave anaminlla eneerokithokoza ni eyano ddiwa.

¹⁹ Athu attheene a woorekama ni a vakhuviru kineerewaavaha murendelle ni waachiriha.

²⁰ Koma athu oonanara tti wonanko enyanja yoovidduwa, yooheera ellapo tuu nave mafundiiwa enakhallella ovokha matokwi ni mihava.

²¹ Khaviri murendelle wa oochimwa, Apwiya sika enallota.”